Semi Sylejmani: Riaktivizohet Rrjeti i Bizneseve Shqiptare në Mbretërinë e Bashkuar

Semi Sylejmani: Riaktivizohet Rrjeti i Bizneseve Shqiptare në Mbretërinë e Bashkuar – takim i rëndësishëm në Londër

Londër, Prill 2025 – Më 5 prill 2025, në Londër u zhvillua një takim i rëndësishëm për riaktivizimin e Rrjetit të Bizneseve Shqiptare në Mbretërinë e Bashkuar, një iniciativë që synon forcimin e bashkëpunimit dhe rrjetëzimit të afaristëve shqiptarë në diasporë.

Ngjarja, e organizuar nga Kryetari i Rrjetit, Semi Sylejmani, mblodhi rreth 100 përfaqësues të bizneseve shqiptare nga e gjithë Britania e Madhe, si dhe mysafirë të nderuar nga vende të ndryshme të Evropës, duke i dhënë takimit një karakter të gjerë ndërkombëtar.

Në këtë aktivitet morën pjesë figura të njohura të rrjeteve të biznesit shqiptar, ndër të cilët:

            •           Omer Nura, Kryetar i Rrjetit Global të Bizneseve Shqiptare

            •           Ylli Blakaj, Kryetar i Rrjetit të Bizneseve Shqiptare në Austri

            •           Visar Robelli, Kryetar i Rrjetit të Bizneseve Shqiptare në Zvicër

            •           Xhelal Mehmeti, Kryetar i Rrjetit për Luginën e Preshevës

            •           Musa Hoti, biznesmen i suksesshëm në Belgjikë

            •           Ardit Zendeli, Kryetar i Rrjetit të Bizneseve në Austrinë e Epërme

Në "Albanian Stars Gala 2025" në Londër, Kryetari i Rrjetit në Angli, Semi Sylejmani, përfaqësoi me krenari Rrjetin Global përballë shumë figurave të njohura dhe afaristëve nga diaspora jonë.

Po ashtu, i pranishëm ishte edhe Zëvendësshefi i Misionit të Ambasadës së Republikës së Kosovës në Mbretërinë e Bashkuar, Vlorat Gashi, i cili shprehu mbështetjen e tij për këtë iniciativë të rëndësishme.

Takimi kishte për qëllim nxitjen e bashkëpunimit ndërmjet bizneseve shqiptare në diasporë, forcimin e komunikimit profesional dhe promovimin e rolit të tyre në zhvillimin ekonomik, si dhe në ruajtjen e identitetit kombëtar.

Në fjalën e tij, organizatori dhe Kryetari i Rrjetit, Semi Sylejmani, theksoi rëndësinë e kësaj nisme dhe u shpreh i përkushtuar për ta zhvilluar më tej këtë platformë bashkëpunimi, në koordinim të ngushtë me Rrjetin Global të Bizneseve Shqiptare.

Ngjarja u pasqyrua gjerësisht nga mediat shqiptare në diasporë, përfshirë Gazetën e Londrës, ALB UK TV dhe TVSH, të cilat kontribuan në promovimin e këtij organizimi me rëndësi për komunitetin shqiptar në Mbretërinë e Bashkuar.