Sakip Cami: Shkolla e Viçishtit më 28 dhjetor 1944

Shkolla e Viçishtit më 28 dhjetor 1944 (Nga kujtimet e Skënder Menzelxhiut) Përgatiti për botim Sakip Cami Me 27 dhjetor 1944, Fehmi Kodra emërohet mësues në Viçisht të Dibrës. Skënder Menzelxhiu në ditarin e tij, kujtime nga LANÇ, botuar në vitin 1974, faqe 51 shkruan:”Gëzimi im sot është i papërmbajtur sepse më në fund pas kaq ndërhyrjesh arritëm ta plotësojmë shkollën e katundit Viçisht me mësues. Edhe më tepër i gëzuar ndjehem sepse mësues është vëllai i shokut tonë të ngushtë, dëshmorit Siri Kodra.” Faqe 51 Shkolla e Viçishtit u inagurua me 28 dhjetor 1944. Mësuesi Fehmi Kodra më vuri në dijeni për gjendjen e shkollës. Është e para shkollë e inaguruar pas çlirimit.

Musa Xheka, që i vjen ndoresh, ka rregulluar 9 banka dhe ka bërë një dërrasë të zezë me copa dërrasash të bashkuara. Fehmi Kodra ka shkuar në Dibër të Madhe dhe ka siguruar bojë të zezë për bankat dhe dërrasën e zezë. Ka shkuar edhe në Tiranë dhe ka siguruar libra, fletore dhe lapsa. Populli, inagurimin e shkollës e festoi me gëzim dhe hare. Nga curlet dhe lodrat atë ditë gjëmuan malet. Prindërit kishin marrë për dore fëmijët e tyre që fillonin shkollën atë ditë. Fëmijët e dëshmorit dhe komandantit të çetës së Gollobordës Ahmet Cami, Dritën dhe Fehmijen, atë ditë e shoqëronte xhaxhai i tyre Kurt Cami. Ndërsa Fiqiri Cami, djali i dëshmorit Musa Cami kishte ardhur vetëm. Ndjekin shkollën e sapohapur 31 nxënëse, nga këto 8 vajza. Vazhdon ditari: Me datë 4 mars 1945 shkova në Viçisht te shtëpia e Sulë Camut, sekretar i këshillit të katundit. Këtu bëmë mbledhjen e këshillit dhe trajtuam problemet e asistencës sociale. Më pas bëra një vizitë te shkolla ku më priti mësuesi Fehmi Kodra. Ndërsa këshilli i rinisë antifashiste me shokët Mois Ahmet Cami, Sinan Seit Markja, Mane Rrem Cami, Shaqir Adem Cami punon shumë mirë. Të gjithë i duan këta të rinj dhe ua dëgjojnë fjalën.