Sadet Dauti: Ing. Skënder Bastri Halilaj ...

Figura e Ing. Skënder Bastri Halilaj – Intelektual, patriot dhe urë lidhëse mes shqiptarëve të të dy anëve të kufirit.

Nga Sadet Dauti

Në historinë moderne të Shqipërisë, pak janë ato figura që i kanë qëndruar besnikë jo vetëm profesionit të tyre, por edhe kauzave kombëtare, shpirtit bashkues të shqiptarëve, dhe rrënjëve të tyre identitare.  Një prej tyre është pa dyshim Ing. Skënder Bastri Halilaj, lindur më 20 shtator 1944 në fshatin Lladomericë, Dibër – një burrë që me veprën dhe jetën e tij është shndërruar në një simbol të urtësisë, guximit dhe përkushtimit qytetar e kombëtar.

Biri i Bastri Halilaj, dëshmor i atdheut, i cili mori pjesë dhe në luftën për Çlirimin e Kosovës, ku ka marrë disa plagë dhe një nga plagët e marra i mori jetën në vitin 1954.

Skënderi u rrit me ndjenjën e thellë të sakrificës dhe dashurisë për kombin. Ai kreu studimet në Fakultetin e Inxhinierisë së Ndërtimit në Universitetin e Tiranës në vitin 1970, dhe që prej asaj kohe ka dhënë kontribut të çmuar si inxhinier ndërtimi – një profesion që e ushtron me pasion edhe sot, në moshë të thyer, si profesionist i licencuar. Ndër momentet më të lavdishme të jetës së tij është padyshim themeli i shoqatës “Bratstvo Albanija–Makedonija” (Vëllazërimi Shqipëri–Maqedoni), e krijuar prej tij në vitin 1990, në një kohë kur kufijtë ndanin padrejtësisht shqiptarët nga njëri-tjetri. Pikërisht nën drejtimin e tij, kjo shoqatë organizoi hapjen e kufirit dhe prishjen e klonit mes Shqipërisë dhe Maqedonisë, duke mundësuar për herë të parë pas dekadash, takimin e mbi 2000 shqiptarëve të ndarë nga kufiri, pa viza, në fshatin Xhepist. Kjo ngjarje madhështore, ku mori pjesë edhe Presidenti i atëhershëm i Maqedonisë, Z. Kiro Grgorov, hyri në histori si një akt bashkimi dhe ndërgjegjësimi kombëtar, me mbështetjen edhe të shtetit shqiptar. Shoqata “Vëllazërimi” u bë për vite me radhë një kanal i rëndësishëm humanitar e kulturor, duke shpërndarë ushqime, veshmbathje dhe ndihma shëndetësore për familjet në nevojë në Gollobordë dhe më gjerë.

Autor i shkrimit

Qendrat shëndetësore zonale, spitalet e Peshkopisë e Bulqizës, si dhe shumë familje në fshatra, përfituan nga përkushtimi i palodhur i Skënder Halilajt dhe bashkëpunëtorëve të tij. Në aspektin kulturor, ai është një promotor i vërtetë i trashëgimisë shqiptare. Nën kujdesin e tij, janë organizuar asamble folklorike dhe aktivitete artistike që ruajtën dhe promovuan identitetin tonë kombëtar. Një prej kulmeve ishte pjesëmarrja në një festival kulturor në Manastir, ku ansambli shqiptar i përzgjedhur nga shoqata fitoi vendin e tretë, duke sjellë jehonën e Gollobordës dhe të gjithë Shqipërisë në skenat e Maqedonisë. Por përveç dimensionit profesional, Skënder Halilaj ka spikatur edhe në fushën e aktivizmit kombëtar dhe politik. Ai është themeluesi i Partisë së Reformave Demokratike Shqiptare në vitin 2001 dhe e drejtoi atë për afro dy dekada, duke e bërë pjesë të koalicioneve që përfaqësonin të djathtën demokratike shqiptare.  Në vitin 2019, kjo forcë politike arriti të siguronte dy mandate deputetësh në Parlamentin e Shqipërisë, si pjesë e një koalicioni opozitar – një arritje që vërtetoi seriozitetin dhe përmasën e tij si lider. Sot, në pension, Ing. Skënder Halilaj mbetet aktiv, modest dhe i përulur, por me një jetë që flet fort.  Ai është i lidhur ngushtësisht me vendlindjen – me Lladomericën, me Gollobordën, me të gjithë ata njerëz që i përkasin kësaj treve të pasur në shpirt, por të lënë pas dore nga politika.

Ai është bashkëshort i devotshëm i Znj. Xhevrije, baba i tre fëmijëve shembullorë – Artanit, Arbenit dhe Majlindës, dhe gjysh i dashur i pesë nipërve e mbesave. Jeta e tij është një frymëzim i rrallë, një model që duhet njohur dhe nderuar nga të gjithë ne. Ing. Skënder Halilaj është më shumë se një emër – ai është një vlerë. Një ndër ata njerëz të rrallë që historia nuk i harron kurrë.