Ruzhdi Gole: GJYS’ ... JO E TËRA

VRANËSI E KTHJELLËT                         

U vranuan gjërat, gjys' jo të tëra,

u vranua rruga por jo hapi

që u mbath prej rrugës,

u vranuan të nderurat

por jo uji që u lau

atyre sytë buzët,

u vranuan të hirtat, më të hirtat,                  por jo përskuqja e  perëndimit                  gjethe zjarrmie tek gishtat.

Sotmot po vranon melodia e duajve

më të buta rrëpirat, pylli jo aq i egër,

buzagaz t'ligat teh më kërcënues

varfëria e re vranohet

dy dimra njëherësh.

Gjethe të hirta prehen tek gishtat.

LAJME TË ORËS ZERO

Qerpikët e orës u lagën

nuk u zgjuan

termometri mbylli sytë

iu derdh zhiva,

Ajri mbante

një degë thyer në duar

asnjë lajm për përmbytjet, bishat.

Ç'mund t'shkruhet sonte paspërpara

e qartë e qetë poaq e rrëmujshme

për njomështitë

dhe të dëlirat

për thonjtë

fëminitë e mardhura

monedhat krunde.?

Rrokur prej floku e beli kozmetikat,

asnjë lajm për shpifjet

asnjë lajm

nga tezgjahu i fushës

tronditjet dhe thikat.

Ajri pikëlluar

një degë thyer në duar...

LUTJE PËLLUMBI

Frymorë jemi ftohur, ngrohur ujërat

njerëzisht squllur, rralluar të urtët,

tehet xixojnë mbi rrugë lundra

më i gjatë verbimi

rrezja e shkurtër...

Njerëzisht ne xhveshur, vesh' pemët

frymorë gulçojmë ngathët e ngratë,

butësisht nga degët varen

pendët si lutje pëllumbi

vrarë qëmoti

çdo çast.

I gjatë verbimi, rrezja e shkurtër,

ftohur fjalët, ngazëllehemi

trazim i paqtë kacafytës.

Cak - CAK

Perëndimi ynë tej, tej po ikën pacak  

si një valëvalë e re më afër frikës     

tingull që pushon ende më pak,

shpejt nesërmi nis bubullon

çka mbet' tret nga e tëra

tek vozitja e tek torba

busulla e gjilpërat ...

Po ikën perëndimi cak-cak

thëllim tepër, tingull pak...