QAZIM D.SHEHU: KUR NGA LARTËSITË BIE…

KUR NGA LARTËSITË BIE…

Kur bie nga lartësitë e mëdha një zjarr

Këputet në mesin e kësaj lartësie,

Kështu vështrimi jot nga larg

Gjer në mes të udhës dritën bie.

 Dhe mesi tjetër mbetet errësirë

Për të menduar për forcën e tij,

Lartësia më afër të ishte, do qe më mirë,

Po vetëm në lartësi të largta zjarri  jep  hije…

 LOT I VOGËL

Pafuqi e botës bëhet e madhe

Nga dalja e një loti…

Është ai çast kur zemra ofshante

Në dridhjen si ndezje e parë baroti.

Sa zjarre, dëshira ,dhimbje

Sa pamundësi ,dridhje ka?

Ky loti i vogël si një thinjë

Që kufiri i moshës nuk e pa?.

GISHTA

Gishtat e bëjnë shqiponjën

Shqiponja ka lindur për to,

Dhe zhduket sakaq kur ato fillojnë lojën

Që shqiponja nuk i do…

Gishtat shpesh harrohen në vend tjetër

Kur me vete nuk i ke,

Ndërsa s`hedh asgjë në letër…

Dhe një fije nga toka nuk e ngre..

eh gishta ,gishta,

Të kapura në rrokullimë të ndjenjës,

Sa e vogël me to bota do të ishte

Kur i lënë shteg gishtit të mesit…

KUPTIMI

Në një anë tjetër të kuptimit ti

Në tjetrin unë,

Si në dy brigje kur bie shi,

E lumi bëhet valëshumë…

Të mbytemi në kuptim s`mundemi

Duam të dalim prej tij

Dhe në brendësi të futemi

Duhet të zhytemi gjithësesi…

Rrobat të heqim si të shkuarën

Nga kujtesa heqim,

Dhe në valët e tërbuara

Pengje kuptimesh mbesim…

BISHTI

Ti rron në këtë stinë qetësisht

Po njerëzit të venë një bisht,

Qetësinë tënde s`e duan

Përderia ajo përgjon e vuan

Çdo sajim fjale për bisht,

Mërzinë largon natyrisht,

Dhe bishtin e tyre e ke

Në cepin e syrit  tek e vë re…

SHKËMBINJTË

Nga gjithë varjet më pëlqen

Të varem në një rreze dielli,

Ta shoh lakun e saj si shkëlqen

Me smeralde qielli.

Kur fronin nga këmbët ta rrëzoja

Së pari do rrëzoja shkëmbinjtë,

Këta mëkatarë që iu tha goja

Duke pritur të puthin qiejt...

NË KRIFË HORIZONTESH TË LODHUR

Në  udhë horizontesh të lodhur

Era vuri krifën e një kali,

Dhe në një re që laget e përmalluar

Kokën e tij  në vrap pas vrapi…

Në krifë horizonti të mbërdhirë

Diçka u ngjit atje,

Një hije mallëngjyese me frymë të tokës

E fortë në formë për të na bindur ne…

KRAHËT E DASHURISË

Krahët e erës nuk janë krahë dashurishë

Krahët e dashurisë më të ajërt mbeten

Ndoshta prandaj era ulërin si bishë

Se këto krahë ende s`i ka gjetur…

FRYMOJ

Zhagitem,bërllokem

Në jetën e mrrolët,

Frymoj,

Molla e Evës

Në dy gjysma hapet,

Mjeroj…