Petrit Malushi: Kryetar!!

E shenjta fjalë “Kryetar”

Të tërheq si magnet,

Të shtyn para, të ndez zjarr,

T’i bën ëndrrat realitet.

Peshë e hije që nuk maten

Mbart mbi vete veç kjo fjalë.

Famë e emër rriten, zgjaten

Prej të gjallëve, tek të gjallë.

S’e lëshon më, kush e kap.

Thuren plane për kurorë,

Rrënjë e degë forcohen rrap,

Firmë e vulë i hedh një dorë.

Humbjet le të vijnë seri,

Trumbetohen si fitore.

Dorëheqje?! Kurrësesi!!

Ndodhin nga “forca madhore!”

Ligjet mbi të tjerë veprojnë,

Kryetarëve fresk u bëjnë.

Mjeshtërisht anashkalojnë,

Statutet shkelin me këmbë.

S’rreshtin me forma, përpjekje,

Gjejnë formula me idhtar.

Nga lindja deri pas vdekje

Të jenë me status kryetar.

Comments