Panajot Boli: UNË E TY, VAJZË E VALEVE

UNË E TY, VAJZË E VALEVE

Dua të trokas sonte në derën tende të vetmisë

Dhe të rrimë pranë e pranë, vajzë e valeve

Në breg të brengës

Të dy, të heshtur mes trishtimit të numërojmë valët

Mos na sjellin në një varkë befas yllin e detit

Në breg të endrrës

Pritjen e gurtë do ta qepim me penjtë e durimit

Valët do t’i bëjmë  më të kripur me lotët

Në breg të shpirtit

Malli i thinjur do të na bashkoj duart  ne të dyve

Do të numërojmë valët në dritën e hënës

Në breg të shpresës

Unë e ty, vajzë e valeve, moj vajzë e trishtimit

Pritjen do ta bëjmë orakull permendore

Në breg të dashurisë