Odise Kote: JE E SHENJTË

 Të gjithë ikën, ti më mbete,

 mike e mirë në këtë botë.

 Ti më shpie në gjithë vendet,

 dhe në qiell, dhe nën tokë.

Ti je ajër, ti je ujë,

je kuptim në thellësi,

je dritë në errësirë,

te çdo thelb, ti je Sy.

Qoftë shteg a gërxh i egër,

 zhur i mjerë a mallkim,

 ti vjen gurgullimë e verbër,

 butësi si jasemin...

Je damari i rrëkezës,

 gjelbërim që çmend natyrën.

 E pamundur të klonohesh,

 shpirtësi e shpirtësirës!

 Të gjithë ikën, ti më mbete,

 mike moj, e paqortueshme.

 Ti më shpure ku s’më qasnin,

 e shenjta, e vetëmjaftueshme...