Fatmir Terziu: ...Është ujësi. - vazhdon leximi në reklamën përkatëse.

1.     LADY ANNE’S DRIVE

(Holkham Village)

Nga Fatmir Terziu

...Është ujësi. - vazhdon leximi në reklamën përkatëse.

Rrjedha sikurse batica, shkruan poezi për çështje fjalori të kufizuar

(siç shihet, sytë si re kalimtare

lexojnë mentalisht prurjet dinamike,

zbardhje të mishta me vena mjalti pa hojë

skuqje dantelle të një fasade harmonike

në detin e ftohtë).

...Është urtësi. - vazhdon trukimi në pikturën murale.

Gota një shenjë e përbashkët unike

në një hapësirë tjetër shumëdimensionale

etja pi, pi me një ndjesi intrige

në Lady Anne’s Drive.

Norwich, e diel 30 Qershor 2025

2.     SHENJA SPARTANE

Me një guackë të zbehur

në arkivën e madhe të detit

Unë zbres të gjitha fortesat,

dhe shpërthimet e dritës së detit të dehur

në shishen ku mbyten të gjithë ngatërresat

ata e ngadalësojnë shkrimin e mbetur

uji gëlltit letra dhe dallgët shenja spartane sikurse fshesat.

Artefakte të pazbuluara, me shënimin tim në vargje

lëvizin me enigmën e dallgëve të bardha midis trarëve,

dhe përhumbja e momentit lë të kuptohet

në pasurinë e valëve,

e dashur Luçiana, sikurse lexohet edhe kësaj ane

ne mirëkuptohemi vetëm me shenja spartane...

Wells -Next-the Sea;  Norfolk, e diel 30 Qershor 2025

3.     KUR KUJTOHET LINDJA

Në kishën lokale të Sheringham

në Altarin e qirinjve të ndezur

pashë një bllok skicash të lidhur me gjalm.

Një udhëtar i panjohur e kishte lënë si një mister të heshtur

historinë mitike të një të riu

dhe vargjet e tij intime të një dashurie të tretur.

Asnjë qiri mbi të

çfarë lutjesh të errëta bllokuan papritmas

atë zë.

Asnjë informacion mbi ndjenjat e tij brenda shportës,

të cilat i nxitën të gjithë vizitorët të ndiznin qirinj pas murit,

me zjarrin e brendshëm të aortës

brenda gurit.

Sheringham, e diel 30 Qershor 2025