Fatmir Terziu: AGSHOL

PIKË ÇUDITËSE

Nga Fatmir Terziu

Një konvenciale e sqimtë në të brendshme,

përkujdesje e urtë,

dikush e percepton me ndjesi të ethshme,

pakujdesi e butë.

Sapo t'ia shtrosh penën sipër,

nga thelbi i leximit,

shkëput verë edhe në dimër,

truku i dimrit.

AGSHOL

Ndërsa qëndisja vargun në mëngjes,

dy retiçenca si gjilpëra bredhi

u ngjizën

në vargun rozë.

E maja e penës heshti

(kujtoi se mëngjeset janë bërë bozë)

e sytë,

ama sytë nuk u ndanë nga sheshi.  

DITA

Dita është një qelq me ngjyra.

Në sy nga retina e hapja e kapakëve

yshten të gjitha,

drita e mban kanavacin e saj misterioz

larg nga pasqyra,

nuk bën të kopjoj qiellin nervoz,

kur i nxin venat e fryra,

(një pjesë zbrazet, por s'mbetet bosh).