Fatmir Musai: AS ME BUZË, AS ME QEPALLË...

AS ME BUZË, AS ME QEPALLË...

Përse femrat s'fishkëllejnë

Dhe një sy s'e mbyllin kurrë?...

Mbase nojmat* që i gënjejnë,

Presin t'ua bëjë një burrë.

Mbase fshihen brenda Mollës

Që Adami ka në fyt,

Janë kaceku që i fryn votrës

Ndaj ai nis edhe shfryn.

S'kanë mësuar as dhe syrin

Që ta shkelin nën qerpikë...

E ç'u duhet kur, të ziun,

E kanë kapur fort në grykë?!

*nojma- shenja që i bëjmë dikujt me sy, me kokë, me dorë, etj.

METAMORFOZË

Nën pupla pëllumbi

Fshihen pendë skifteri,

Në Ferr a Parajsë

Të çon Aligeri*!

Mos u fshih si morr,

Je në Purgator!

*Aligeri- Dante Aligeri i Komedisë Hyjnore

PALAFIKU

Kur ti je në majë të fikut,

Tak me sy ia bën ashikut,

Tak me se sy, tak me qepallë,

Se je specie fort e rrallë!

Po një ditë kur bëhesh rrekë

E ushkuri s'mban më brekë,

Bie ti nga majë e fikut,

Bëhesh pre e palafikut!

... Varg e varg palat e fikut,

Qepur me pe të ashikut!

URTËSI

Ç'del nga macja gjuan minj,

Ka pas thënë një plak i urtë,

Shkopin mbante në pëqinj*,

Si t'i donte mushka drutë.

Nuk i qaste ndënë sofër

As kotelet sa një lodër!

*pëqinj- shumësi i fjalës prehër