BUJAR QESJA: Me besim se gjërat do të shkojnë për mbarë

Durrësi dhe durrsakët në fokusin e takimit të dy mjeshtrave

 -Me besim se gjërat do të shkojnë për mbarë

BUJAR QESJA

Një bisedë miqësore, e nxitur nga shoqëria e hershme ngacmoi takimin e dy Mjeshtrave të Mëdhenj Haxhi Rama dhe Bujar Qesja. Në fokus Durrësi dhe durrsakët, ecuria sa më e mbarë e punëve në vendlindjen e përbashkët. Rama, regjisori dhe shkrimtari ynë i njohur, shprehu falenderimin për inmemoriam-in kushtuar shokut tonë të përbashkët, kuadrit dhe ekonomistit të njohur në Durrës, personalitetit të qytetarisë durrsake, skulptorit Bajram Likmeta. Bajrami u nda papritur nga jeta, megjithëse diabeti rebel po i brente fizikun  nga dita në ditë.

Teksa diskutonim për këtë portret të njohur të Durrësit, nuk mund të linim menjëanë përpjekjet që duhen bërë, që njerëz të natyrës së Likmetës dhe jo vetëm, ti bëhen të njohura opinionit kur largohen nga jeta, apo kur kanë arritjet në punët e tyre. Opinioni brenda dhe jashtë Durrësit, por edhe në diasporë kanë nevojë të njihen, të informohen çfarë ndodh në qytetin e tyre. Por si? Në ç’mënyrë?

A mund të bashkërendohen përpjekjet për botimin e një gazete, të paktën të përjavshme që ta ketë emrin “Durrësi”, apo diçka të përafërt me këtë? Të marrë përsipër informimin e durrsakëve dhe më gjërë, se çfarë ndodh në qytetin e tyre, të rejat, dukuritë, problematikat, planet e afërta dhe perspektive të Durrësit, objektiva lokale dhe kombëtare, aq më shumë në këtë kohë kur informacioni është bërë ushqim shpirtëror për secilin.

Kjo gazetë për zhvillimet dhe progresin  e Durrësit, është domosdoshmëri. Të ketë rubrika të ndryshme: risitë, përurimet, historia dhe muzeumet, afrimi i turistëve, zhvilllimi i plazhit, qendrave urbane, porti i jahteve, apo porti i ankorimit të anijeve të mallrave, planet e zhvillimit të qytetit dhe të zonave rurale etj. etj. Kjo kërkohet nga njerëzit. Na e kanë bërë prezentë, sa herë na takojnë dhe takohemi me të ndryshëm.

Dhe në kësi rastesh, fokusi përqendrohet tek Bashkia e Durrësit, që mund të marrë përsipër botimin e kësaj gazete të përjavshme, me një miniredaksi dhe me mundësi të shumta të propagandimit të vlerave. Natyrisht duhet  bërë projekti përkatës dhe të mundësohet miratimi i tij në kohën më të shpejtë të mundshme, pas analizave dhe bashkbisedimeve përkatëse. Ne marrim përsipër logjistikën shpirtërore dhe profesionale, të tjerat veçanërisht ajo financiare mbetet problem i Bashkisë.

Besimi tek kryetarja e Bashkisë Emiriano Sako si zakonisht mbetet i madh, pasi në fund të fundit ky organ shtypi po të shikojë dritën e botimit, do t’i bëjë jehonë punëve në Durrës që mbulohen nga Bashkia. Durrësi është qendër e fuqishme turizimi, me bregdetin më të shtrirë dhe më modern në Shqipëri, qendër e historisë, arkeologjisë dhe kërkimeve nënujore, e kulturës, muzikës dhe arteve pamore, etj. etj.

-Me thënë të drejtën, ngau bashkëbisedimin mjeshtri Haxhi Rama shkrimi për Bajram Likmetën, më ngacmoi të dilnim edhe tek ky diskutim, që Durrësi të ketë një organ shtypi, mbase edhe mund të shpërndahet falas, që të marrë përsipër se çfarë ndodh dhe çfar bëhet në qytet.

Por ndër të tjera, të shkruhet edhe për punët e sektorëve në Bashki, takimi me njerëz, interesat e qytetarëve, mënyra se si i zgjidh Bashkia ankesat dhe kërkesat e tyre, raportet me ndërkombëtarët qoftë në binjakëzime apo edhe në lidhjet tregtare dhe kulturore. Durrësi është edhe qendër arsimore universitare, shendetësore, sportive, me akademi dhe shoqata kulturore dhe sportive, ku rroken shumë punë, shumë lidhje dhe bashkëpunime të natyrave të ndryshme.

Kur dy mjeshtra takohen dhe në esencë është Durrësi dhe durrsakët, vendlindja jonë e përbashkët, kur besohet të gjëndet edhe gjuhë mirkuptimi me Bashkinë dhe Kryetaren e saj Emiriano Sako, nuk ka sesi këto lloj projektesh, apo propozimesh të mos marrin jetë. Veç interesave të Durrësit dhe të durrsakëve, asgjë tjetër nuk ka në këtë mes.

Kur takohen dy mjeshtra dhe kur bisedojnë me sinqeritet dhe seriozitet, shikohet dritë në mbarësinë e punëve. Dhe në se kjo ide e konsumuar në tryezën e ngushtë të dy miqve dhe dy mjeshtrave do të marrë jetë, Durrësit i shtohen të tjera mundësi evidentimi dhe njohjeje.

Pandaj edhe konaku im, po merr përmasat e një institucioni moral për durrsakët, pasi në të takohen njerëz me vlerë për qytetin dhe që diskutojnë për ecurinë dhe perspektivën e tij.

 Me besim se gjërat do të shkojnë për mbarë.