BUJAR QESJA: Isuf Ferra 70 vite jetë mes traditës, punës dhe vizionit sipërmarrës

...Durrësi ka arsye të jetë krenar për bijtë e tij. Dhe emri i Isuf Ferrës është një prej tyre, i gdhendur tashmë në kujtesën e qytetit si simbol i punës, i nderit dhe i besës...

BUJAR QESJA

Mjeshtër i Madh

Shtatori i këtij viti, shënon përvjetor të veçantë për nga figurat më të njohura të botës së biznesit dhe jetës qytetare në Durrës. Biznesmeni i afirmuar Isuf Ferra feston 70-të vjetorin e lindjes, duke sjellë në kujtesë rrugëtim jetësor të gërshetuar me trashëgiminë e pasur familjare, përkushtimin qytetar dhe vizionin modern në fushën e ekonomisë private.

Një trashëgimi familjare e jashtëzakonshme

Isuf Ferra vjen nga një familje me rrënjë të thella patriotike, shoqërore dhe qytetare.

I ati, Ramazan Ferra, ka mbajtur me nder titullin “Hero i Punës Socialiste”, duke lënë gjurmë të forta si shembull i ndershmërisë, përkushtimit dhe punës së palodhur në zhvillimin ekonomik të vendit. Nipi i dëshmorit Isuf Ferra, nga bijtë e rënë për atdhe në vitet e luftës, ai trashëgoi emrin e tij, duke mbajtur mbi supe përgjegjësinë e një tradite të shenjtë.

Nga ana e nënës, është i lidhur me Sefer Efendi Kazazin, portret i njohur i mendimit kombëtar dhe emancipimit qytetar, pjesë e plejadës së personaliteteve që e kanë nderuar Durrësin dhe Shqipërinë.

Tjetër hallkë e shquar në këtë zinxhir është Zyhra Ferra, halla e Isufit, personazhja kryesore e filmit “Rrethi i Kujtesës”, e cila përfaqëson kapitull dramatik të historisë shqiptare. Zyhraja, luftëtare e shquar e Luftës Antifashiste, u masakrua në spitalet jugosllave pas çlirimit, duke u shndërruar në simbol të qëndresës dhe sakrificës.

Kjo trashëgimi nuk është thjesht histori. Është shenjë e përhershme që udhëheq çdo hap të tij, barrë krenarie që e bën të përkushtohet me më shumë seriozitet ndaj jetës dhe qytetit.

Nga Shkozeti, drejt sukseseve kombëtare

Që nga fillimi i viteve ’90, me hapjen e tregut dhe krijimin e mundësive të reja ekonomike, Isuf Ferra ndërtoi me përkushtim dhe largpamësi një ndërmarrje që do të kthehej nga më të rëndësishmet. Ferra & Co shpk, me seli në Shkozet të Durrësit, është sot nga kompanitë më të fuqishme private shqiptare.

Kompania ka shtrirje në disa fusha:

Në këto tri dekada, Ferra & Co është shndërruar në strukturë të fuqishme, ku punësohen dhjetëra familje dhe ku ndërtohet kulturë e qëndrueshme e sipërmarrjes.

Import-eksport i produkteve ushqimore dhe mallrave të konsumit të përditshëm. Investime në sektorin e hidrokarbureve, duke kontribuar në stabilitetin e furnizimeve. Transport kombëtar dhe ndërkombëtar, fushë ku Ferra & Co ka garantuar standarde dhe besueshmëri. Aktivitet ndërtimor, që ka sjellë projekte të rëndësishme për zhvillimin e zonës.

Shkozeti, i gjallëruar nga ritmi i punës, është i lidhur pazgjidhshmërisht me emrin Isuf Ferra. Aty nuk shihen vetëm ndërtesa dhe depo, por mbi të gjitha një filozofi pune, se suksesi nuk është rastësi, por rezultat i vizionit dhe këmbënguljes.

Në një mëngjes të zakonshëm Shkozeti, aty ku motorët e kamionëve nisin ditën dhe depot marrin jetë nga lëvizja e mallrave, emri i tij jehon i qetë, por i pranishëm. Isuf Ferra nuk është thjesht sipërmarrës. Është ura lidhëse mes një trashëgimie të madhe familjare dhe një realiteti modern ekonomik.

Përgjegjësi qytetare dhe dimension shoqëror

Figura e tij nuk shfaqet vetëm në botën e biznesit. Për Isuf Ferrën, suksesi nuk ka kuptim nëse nuk ndahet me të tjerët. Përmes mbështetjes së aktiviteteve kulturore, sociale e sportive, ka qenë gjithmonë i pranishëm në jetën e qytetit. Për të, lidhja me Durrësin nuk është vetëm ekonomike, por edhe shpirtërore.

Ka ditur ta ruajë me krenari mbiemrin Ferra, që lidhet me një fis të njohur, me histori të lavdishme, me gjurmë të pashlyeshme në kujtesën qytetare.

Në Durrës, shumë iniciativa kanë pasur pas vetes mbështetjen e tij të heshtur, por të qëndrueshme. Nuk ka zgjedhur të jetë në qendër të vëmendjes, por të veprojë me qetësi, duke besuar se vlerat flasin më shumë se fjalët.

70-të vjetori moment reflektimi dhe urimi

Arritja e 70-të viteve është moment i veçantë, pikë ndalese për të parë prapa por edhe përpara. Pas krahëve ka jetë të mbushur me punë, sakrifica, arritje, sfida të kapërcyera me sukses. Përpara shtrihen ende shumë projekte, shumë ëndrra, shumë mundësi për të lënë gjurmë të tjera.

Në këtë ditë jubile, miq, bashkëpunëtorë, të afërm dhe qytetarë e përgëzojnë për rrugëtimin e tij dhe i shprehin mirënjohjen për kontributin që ka dhënë dhe po jep.

Urime të përzemërta, Isuf Ferra, për këtë 70-të vjetor të lindjes!

Qoftë ky përvjetor stacion i bukur, ku ndërthuren kujtimet e çmuara të së kaluarës me ëndrrat e reja të së ardhmes! Qofshi gjithmonë i shëndetshëm, energjik dhe vizionar, duke i shtuar Durrësit dhe Shqipërisë vlera të reja në çdo hap që hidhni.

Në ju mishërohet trashëgimia e një familjeje të nderuar, ndershmëria e një qytetari, përkushtimi i një punëtori të palodhur dhe largpamësia i një sipërmarrësi që di të ngrejë ura.

Mbeçi shembull i përhershëm i përkushtimit qytetar dhe i sipërmarrësit që e sheh biznesin si mision, jo thjesht si fitim.

Durrësi ka arsye të jetë krenar për bijtë e tij. Dhe emri i Isuf Ferrës është një prej tyre, i gdhendur tashmë në kujtesën e qytetit si simbol i punës, i nderit dhe i besës.