BUJAR QESJA: Grua që rritet me dritë dhe udhëheq me shpirt

Elsa Ekonomi Hila: Një jetë në shërbim të fjalës, dijes dhe dashurisë

-Grua që rritet me dritë dhe udhëheq me shpirt

Me rastin e 74 vjetorit të lindjes

BUJAR QESJA

"Mjeshtër i Madh"

Në këtë ditë të bekuar, kur jeta i shton tjetër stinë të bukur një gruaje të rrallë, mendja dhe zemra shkojnë drejt emrit, që për dekada mbetet simbol i dijes, kulturës dhe qytetarisë durrsake Elsa Ekonomi Hila.

Bijë e një figure të pavdekshme të arsimit dhe mendimit pedagogjik, profesor Mihal Ekonomit, Elsa ka ditur ta mbajë me dinjitet të lartë fjalën dhe veprën e të atit. E brumosur me dashurinë për librin, me pasionin për mësimdhënien dhe me ndershmërinë qytetare që e ka shoqëruar gjithë jetën, është shembull frymëzues për breza të tërë nxënësish, kolegësh dhe prindërish.

E diplomuar në gjuhë-letërsi, ia ka kushtuar gjithë jetën arsimit, më parë si mësuese e përkushtuar, e dashur dhe kërkuese, pastaj si drejtuese vizionare e shkollës së parë private në Durrës, që mban me krenari emrin e të atit: “Mihal Ekonomi”. Nën drejtimin e saj, kjo shkollë është shndërruar në vatër të vërtetë edukimi, kulturimi dhe qytetarie, ku çdo nxënës merr jo vetëm dije, por edhe frymë të pastër humanizmi.

Në krah të saj, gjithmonë ka qëndruar bashkëshorti fisnik dhe i përkushtuar, Vasil Hila kuadër i njohur i qytetit, agronom i aftë dhe administrator i mençur, i cili ka ndarë me Elsen jo vetëm jetën, por edhe misionin fisnik të formimit të brezave të rinj. Së bashku, kanë ndërtuar familje model, të respektuar e të dashur, me dy vajza që kanë ndjekur rrugën e suksesit dhe jetojnë në Shtetet e Bashkuara të Amerikës, duke mbajtur gjithmonë në zemër Durrësin dhe vlerat që u kanë mësuar prindërit.

Elsa është më shumë se një mësuese, më shumë se një drejtuese. Është institucion në vetvete, profil që përfaqëson me dinjitet qytetarinë durrsake, finesën intelektuale dhe dashurinë për njeriun.

E thjeshtë në paraqitje, por madhështore në shpirt. E butë në fjalë, por e fortë në parime. E respektuar, e dashur, e nderuar nga të gjithë kolegë, ishnxënës, prindër dhe miq të panumërt, që e kanë ndjerë gjithmonë pranë, me buzëqeshje, mirësi dhe mençuri.

Në këtë 74-të vjetor të jetës plot dritë, ne i urojmë nga zemra:

shëndet të plotë, paqe shpirtërore dhe shumë vite të tjera frymëzimi!

Urojmë që të vazhdojë të jetë ajo që ka qenë gjithmonë një grua e mençur, e dashur, e përkushtuar dhe e ndershme, një mësuese që ndriçon mendje dhe një njeri që ngroh zemra.

Gëzuar ditëlindjen, zonjë e urtë, mësuese dhe qytetare e nderuar e Durrësit!

Drita juaj e mirë dhe emri juaj i pastër, janë dhuratë për të gjithë ne që kemi pasur fatin t’ju njohim dhe t’ju vlerësojmë.