Billall Maliqi: ZANA PIRA, POETE ME VEÇANTINË E SAJ

ZANA PIRA, POETE ME VEÇANTINË E SAJ NË POEZI !

Nga Bilall Maliqi

Zana Pira, është një poete, e cila shkruan me një stil të veçantë, dhe ka një art, po ashtu të veçantë. Ky pohim imi, lidhet drejtpërdrejt me leximin e krijimeve të saj poetike, si në librat e saj paraprakë, të botuara dhe ato të dorëshkrimit, të cilat japin të kuptojmë se kjo krijuese, atë që e shkruan, e stolis me vlerë e me figuracion të duhur poetik. Kur jemi tek individualiteti krijues dhe te poetika e Zanës, ndërlidhemi me poezitë e saj, me vlerat dhe me gjetjet, që japin të kuptojmë seriozitetin në krijime. Kjo penë, nuk shkruan shumë, por atë që e shkruan, e shoqëron me vlera të pakontestueshme. Kjo shihet edhe në këtë përmbledhje poetike të titulluar “Duart e babait” , në të cilat lexuesi do të ndeshet me poezi me vlera të veçanta, të shkruara me një përkushtim shumë të madh, prandaj, si të tilla poezitë e librit kanë fuqi shprehëse, vargjet korrespondojnë natyrshëm në mes veti, secila poezi ka porosinë drejtuar lexuesve, dhe secili lexues gjenë veten brenda krijimeve poetike të librit dhe të librave e të poezive të saj.

Në poezitë e saj shpërfaqet dashuria për prindërit (babain), në poezinë “Malli më vret”, poezi të cilën e stolis bukur mirë me shprehje e figuracion të pasur poetik. Në poezinë kushtuar babait, Zana, shkrin gjithë ndjesinë e saj në vargje përkushtimore, sa ndjenjësore, po aq edhe mallëngjimit të pasosur kurrë, dialogon me babain e ndjerë, një dialogim të bukur e të fortë poetik, të cilin e mvesh me figura: si epiteti, krahasimi etj., të cilat e bëjnë më të fuqishme dhe më me vlerë poezinë. Duart e babait, kjo një simbolikë e fuqishme, me të cilën lidhet drejtpërdrejt një jetë e tërë me dahsurinë për babain, për kujtimet që shpërfaqin një realitet që nga fëmijëria, me të gjitha ecejaket nëpër kohë dhe nëpër situata të ndryshme.

Autori i shkrimit

Por, jo vetëm kjo poezi, por edhe poezitë të tjera, të cilat i ka ndarë në cikle poetike, japin ngjyrime të ndryshme, të ndërlidhura me barazpeshën e vlerës artistike. Zana Pira është një krijuese e veçantë dhe i takon brezit të krijueve të shekullit xx-të, e cila ka pasur bashkëpunim me shkrimtarë dhe poetë elitarë dhe të njohur gjithandej trojeve shqiptare dhe me poetë të brezit më të ri, me botues e shtëpi botuese të njohura, të cilat kanë nivel, kritere dhe cilësi në botime. Kur jemi te krijimet e Zanës, themi edhe këtë se ajo shkruan vetëm poezi për të rritur, pra i ka ngelur besnike këtij ligjërimi poetik, dhe të tillën e shkruan dhe e kultivon bukur, kjo shihet në shëtitje të leximit të librat e saj, në dhjetë sosh, por edhe të këtij libri, dhe do të bindemi se çdo gjë që shkruhet mirë për Zanën, këtë pa dyshim se e meriton.