Bilall Maliqi: “MIQTË PËR MIKUN” NJË DHURATË E ÇMUAR!

Para nesh kemi një libër me vlerësime miqsh për krijimtarinë letrare të poetit Jashar Esati, përgatitur në autorësi të shkrimtarit Namik Selmani, me titull “Nëpër rreshta fjalësh”.

Shkrimtari Namik Selmani, e ka përcjellur hap pas hapi krijimtarinë e gjithmbarshme letrare të poetit, në shumicën sosh të librave e kemi rolin e tij të redaktorit apo të recensentit. Ai ka shkruar recensione, parathënie, për ato libra që i ka redaktuar, duke ua dhënë dritën jeshile për botim. Por jo vetëm kaq, për poetin, Esati kanë shkruar edhe pena të tjera, të cilët i kanë vlerësuar librat që i kanë lexuar, apo që i kanë shtjelluar, qoftë si parathënie, pasthënie, mbresa apo edhe vështrime, të cilat janë të botuara si në librat e tij, në portale apo edhe në revista letrare.

Miqtë për mikun !

Për të shkruar vlerësime për librat, ato duhet lexuar me vëmendje, dhe secili nga këta, është munduar të japë maksimumin për t’ja dhënë “hakun” shkrimeve të tyre, kuptohet në kapacitetin e tyre vlerësues dhe qëmtues, të cilat, shkrimtari, Namik Selmani i ka tubuar në këtë libër si dhuratë nga miqtë e tij, për këtë shtatëdhjetë vjetor të lindjes, e që është një befasi e këndshme.

U kuptua se secili ka bërë vështrimet me mundësitë dhe kapacitetin intelektual dhe profesionist për librat e lexuar si: Namik Selmani, Bilall Maliqi, Zekerija Idrizi, Sevdail Hyseni, Mustafa Ismaili, të cilët kanë dhënë  kontributin e tyre për shtjellimin e librave sa më mirë që është e mundur, duke paraqitur të dhëna të thukëta për vlerat ideo- artistike dhe ideo- estetike, të librave të tyre, qoftë në poezi për të rritur, poema që i ka brenda librave të tyre si /Te Zabeli i Mulës/ dhe prozat e tij të drejtpërdrejta dhe të kapshme për të gjitha shtresat e lexuesve, të cilat japin sinjalin e vlerave të kënaqshme letrare, gjithnjë duke u thirrë në mendimet, vlerësimet dhe qëmtimet e vlerësuesve të lartpërmendur.

Përveç kësaj, brenda këtij libri i gjejmë edhe  mbresat e Rrahman Hysenit e të Shaip Bllacës, të cilat janë shkrime të çastit, të shkruara me modestinë e tyre dhe dëshirën që të japin mendim për librat që i kanë lexuar, si një dhuratë për mikun e tyre.

Këto dy mbresa të shkruara japin mendime të ndryshme, për libra të ndryshëm dhe për profilin krijues të protagonistit të librit, poetit Jashar Esati.

Se Jashar Esati është i lidhur si mishi me asht për vendlindjen e tij, kjo shihet në poezitë e tij të cilat japin një pasqyrim të tillë, japin mallëngjim, dhembje, mërzi të shtresuara të autorit për itakën e tij, të cilat, po të lexohen vëmendshëm gjejmë porosinë e lagur me lot dhe shpirtin e tij të ngarkuar me të gjitha këto ndjesi të fuqishme të mungesës së vendlindjes së tij. Ato i mban krahosh ngado që është, kudo që shkon dhe kudo që gjindet, sepse malli për Zabelin e Mulës, për Miratocin e tij të dashur e ndjek kudo dhe ngado si një hije që ndjek trupin e tij vertikal.

Rëndësia

Ky libër ka rëndësinë e vet, së pari për autorin, së dyti për protagonistin e librit, së treti për autorët e përfshirë në libër dhe së katërti për lexuesit dhe studiuesit që duan të shkruajnë për këtë autor dhe për botimet e tij, sepse autori, Namik Selmani, i ka tubuar këto shkrime të shpërndara dhe i ka futur në këtë libër simpatik, si një tërësi e shkrimeve brenda kopertinave të këtij botimi të veçantë.