Ardita Jatru: Çfarë është vjeshta?

Ajo dritë e pakët dielli,

prapa reve të buta mëndafsh

me nuanca gri si udhë që provokojnë dëshirën,

në majë të malit me antenat e ngritura

që ndërhyjnë makabër si shigjeta në iris.

Dhe unë mundem vetëm të imagjinoj

ngjyrën e pyjeve.

E di, atë fustan

prej vitesh e mbaj të veshur në kohën e kryer.

Kjo dremkë e lehtë e natyrës!

Hallakatjet e mia disiplinohen aty

dhe zbutem; bëhem sfungjer.

Mungesa ime e përqendrimit.

E kam lënë veten të lirë.

Kam qenë e ashpër me të.

Rreth e rrotull meje

një gardh me shpina të kthyera prej kohësh.

Kotja e dorës time nëpër gëzofin e maces

dhe këto mendime pa vlerë,

kjo është vjeshta.