Ambasadori Mal Berisha: KOSOVË: KUJDES – WARNING!!!!

Prof Dr Fatmir Terziu
Sep 18
2 min read

Dëshmia e James Rubin, ish-zyrtar i lartë i Departamentit të Shtetit Amerikan në kohën e ndërhyrjes së NATO-s kundër caqeve ushtarake serbe, dhënë dje në Gjykatën Ndërkombëtare të Hagës, ka hapur dy pista shumë të rëndësishme mbi të cilat duhet të reflektojnë politikanët e Republikës së Kosovës:

• Brenda asaj administrate nuk ka pasur kurrë një mendim të unifikuar, por ka ekzistuar pluralizëm dhe mendim alternativ – rasti Albright – Rubin – Christopher Hill.

• Ky është një mësim i madh për politikën e sotme, pasi nuk do të ishte aspak e habitshme që edhe sot, brenda asaj administrate, të veprojnë “James Rubinët” dhe “Christopher Hillët”. Cili do të fitojë? Këtu luhet fati i Kosovës, sepse prej aty varet se nga cila anë do të anohet kandari.

Për këtë, po sjell më poshtë një fragment nga një shkrim që e kam botuar shumë kohë më parë:

A ISHTE KONFERENCA E RAMBUJESË PËR PAVARËSINË E KOSOVËS APO PËR AUTONOMINË TITISTE – MILOSHEVIÇIANE TË SAJ?

Disa mendime lidhur me intervistën e Ambasadorit Amerikan në Beograd, Kristofer Hill rreth Autonomisë /Pavarësisë së Kosovës.

Që prej shkurtit të vitit 1999, kur Konferenca e Rambujesë i mbylli punimet, por mbi të mbeti pezull një re e errët:

A ishte ajo për Pavarësinë e Kosovës apo për rikthimin e saj në gjendjen e Autonomisë së vitit 1974?

Pra, a do të ishte ajo Kosova që shohim sot – e lirë dhe e pavarur – apo do të kthehej në Kosovën e demonstratave të studentëve, të vrasjeve nga policia dhe ushtria terroriste serbo-jugosllave, të burgosjeve, bastisjeve, ekzekutimeve dhe të djemve shqiptarë që në ushtri ktheheshin në shtëpitë e tyre si të “vetëvrarë”?

Pikërisht në atë kohë qarkullonin në Kosovë disa emisarë amerikanë, të cilët bënin deklarata publike skandaloze. Njëri prej tyre ishte Gellbarti, i cili e cilësoi UÇK-në si një organizatë terroriste. Tjetri ishte ai që më vonë do të shpallej “hero” i Kosovës – i ndjeri Richard Holbrooke. Ky i fundit ndryshoi qëndrim vetëm pas vizitës së tij në Deçan, kur njohu realitetin shqiptar nga afër, pas 18 orësh bisedimesh të pandërprera me Sllobodan Millosheviçin, që ia kishin formuar më parë opinionin për shqiptarët.

……

Kanë kaluar 26 vjet dhe kësaj pyetje i ka dhënë përgjigje pa asnjë ekuivok, Ambasadori i sotëm amerikan në Beograd, Kristofer Hill, në atë kohë negociatori i Shteteve të Bashkuara të Amerikës në Rambuje, në një intervistë të dhënë mediave serbe ku ai shprehet tekstualisht:

“Roli im në Rambuje ishte të tentoja që Kosovës t’i kthehej shkalla më e lartë e autonomisë që ajo kishte dikur. Rambujeja nuk u mor me pavarësinë e Kosovës; kjo ndodhi më vonë, kur unë nuk isha pjesëmarrës.”

Këtë fakt e dëshmoi dje në Hagë James Rubin.

Vëllezër kosovarë, kujdes!

Për shkak të retorikës antiamerikane dhe lënies së vendit pa drejtim parlamentar – dhe për këtë shkak pa qeverisje – mos u habisni kur balanca e kandarit amerikan të anohet nga “Christopher Hill-ët” e sotëm, e jo nga “James Rubin-ët”.

Modestisht dëshiroj t’ju ftoj (ata që kanë mundësi) të lexojnë shkrimin tim për Rambujenë – për të gjithë ata që janë vërtet të interesuar dhe të shqetësuar.

Respekte

Mal Berisha