Agim Vuniqi: Fëmijët nuk janë dekor për lajme!!!

Liria e medias nuk shtrihet mbi fytyrën e fëmijës

Agim Vuniqi

Reagimi i presidentes Vjosa Osmani kundër publikimit të imazheve të fëmijëve të mitur nga mediat u prit me tone kritike nga Shoqata e Gazetarëve të Kosovës. Por pyetja thelbësore është kjo: a ka të drejtë gazetaria të fshihet pas flamurit të lirisë së shprehjes, kur në anën tjetër shkelet privatësia dhe dinjiteti i fëmijës? Në demokracitë perëndimore, një gjë e tillë është e paimagjinueshme. Në shkollat publike të Francës, Gjermanisë apo SHBA-së, asnjë gazetar nuk mund të hyjë me kamera pa autorizimin e shkruar të prindërve. Madje edhe vetë institucionet arsimore janë të kufizuara: fotografitë e fëmijëve nuk publikohen në rrjete sociale pa lejen eksplicite të kujdestarëve ligjorë. Arsyeja është e qartë – mbrojtja e privatësisë dhe sigurisë së fëmijëve është më e rëndësishme se çdo kronikë televizive.

Në Kosovë, për fat të keq, ky standard shpesh anashkalohet. Gazetarët e shohin vetveten si “mbrojtës absolut” të së drejtës për informim, duke harruar se kjo e drejtë ndalet aty ku nis e drejta e tjetrit për privatësi. Kur bëhet fjalë për fëmijë, shkelja është edhe më e rëndë, sepse ata janë kategoria më e pambrojtur.

Le të kujtojmë një fakt themelor: Konventa për të Drejtat e Fëmijës e OKB-së, të cilën Kosova e ka inkorporuar në legjislacion, në nenin 16 ndalon qartësisht çdo ndërhyrje arbitrare në jetën private, nderin dhe reputacionin e fëmijës. Çdo shtet dhe çdo institucion është i obliguar ta mbrojë fëmijën nga këto shkelje. Pra, ligjërisht dhe moralisht, qëndrimi i Presidentes është i mbështetur në standarde ndërkombëtare.

Shoqata e Gazetarëve, në vend që të ngrejë “mburojën e lirive”, duhej të kishte qenë e para që të paralajmëronte mediat për kujdes dhe etikë profesionale. Sepse gazetaria nuk matet me numrin e klikimeve, por me respektin ndaj dinjitetit njerëzor. Nëse një fëmijë mund të bëhet viktimë e bullizmit vetëm pse u shfaq në një kronikë televizive, atëherë gazetarët nuk po informojnë – ata po dëmtojnë.

Në fund të fundit, fëmijët nuk janë dekor për lajme. Ata janë qytetarët më të brishtë të shoqërisë sonë dhe meritojnë mbrojtje maksimale. Kosova që synon integrimin evropian nuk mund të lejojë që kamerat të jenë më të fuqishme se Konventa e OKB-së.