Dehje
Nga Fatmir Terziu
Disa buzëqeshje janë magnituda gënjeshtre.
Sytë ikin prej tyre
në xhirron e fundit të Bulevardit
ku kafja Ekspres ka mbetur mes buzëve
shenja e fundit
ndaj ndjej ende kohën kur krihem
me mirëmëngjesin e rrezeve në shesh
ndërsa udhëtoj në këto vargje
me buzët vesh më vesh.
Jam aty teksa ndodh të buzëqesh
disa buzëqeshje janë gabime të poetit. Ju do të
korrigjoni gabimet mes vargjeve
nëse mundeni. Jam i përhumbur
në puthjen e ngrohtë të një konjaku,
të dergjur në buzët e ftohta,
duke transferuar buzëqeshjen e buzëve të tua
të nxehta, prush… të ngrohta.
Më korrigjoni! Jam dehur?
Jam fiksuar të digjem duke buzëqeshur.
Elbasan, kafenetë udhës së Stadiumit 2019
Adoleshenca e syve
Nga Fatmir Terziu
Gjatë gjithë gushtit,
palmat përlagen në pëlhurën e tyre,
gëzojnë,
festojnë,
shkumojnë pije të ndryshme
lakuriq, trupat e tyre,
të lodhura duke festuar.
Kjo festë zgjon vetë arsyen
e adoleshencës së syve më shumë se vapa
para Hotelit dhe Teatrit “Skampa”.
Gjatë gjithë gushtit
digjen me ëmbëlsinë e dëshiruar përmes trupit.
Shënim
Fatmir Terziu
Nëse ndodh të ndahemi nga kjo fotografi
këto ditë kujto shkrepjet e fundit
portokallat, selvitë
Unë të premtoj nuk do të vonohem
nëse humb në këtë qytet
ku zhurmat ia betonojnë përditë
venat e tij.
Dhe nëse ndodh të shfaqesh bardhë e zi
sytë do të ngjyrosin
si atë ditë
e Ti do të jesh reklama e munguar
në xhamat e ish kinema “11 Nëntorit” për një film.
Mos më thuaj që s’e di
reklama është vetëm sfond në fotografi.
E ky është thjesht një shënim
i mallit për ty...
Korab
NgaFatmir Terziu
Era. Thjesht era. Gudulisja e fushës,
një psherëtimë e gjatë e thellë,
prapë e prapë si një tegel,
çdo gjë qepet e shqepet në vend
çdo erë ka një mall
mbi një shall të mëndafshtë.
Një modë e gjallë
konkuron me legjendën e lashtë
era duke projektuar
të shpupuris në majë
klithma e Drinit në rrokadë,
sepse ecja është kaq e qetë
ne jemi veç një mision i vetëm
në këtë projekt.
Ka një lagështi të mjegullt në sytë e tu
ndërsa trupat tanë zbehen,
ne po hyjmë në atë vend të fshehtë
ku gramatika, sintaksa dhe aritmetika
nuk kanë asnjë shenjë përtej kuptimit;
është natë në Korab
akti biblik i perceptimit.
Një trilion fllade masive
fryjnë e bëhen një me erën
i dashur Korab je një grimë mes syve
kërkon të hysh me ne në një fole,
ky fllad qenka pjesë e të gjitha risive
ndërsa ëmbël, e më ëmbël na vë të flemë.
2018-2020
Pakt
Nga Fatmir Terziu
Qerpikët tanë ngjyen
si krahët e dy zogjve në një natë me shi
Ti qesh dhe buzët e tua koloviten
rathëve ku cikli i jetës riciklohet
vetëm në një Sy
etja vegjeton po aty,
njëkohësisht:
“Çfarë syri i qetë qenka ky
pa mburrje, pa drithmë në retinë!”
Dhe heshtja shkon më tutje
me një puthje mek buzët
si një bletë që thith nektar lulesh,
puthja e nxehtë lëshon tangën e rrushit
e vera mushtet në shtëmba
me gojët tona tashmë ka punë Hëna.
Dremis mbi blunë e paqtë
buzët e tua marrin një ngjyrë të re,
dhe sytë … dhe syri pushon sakaq
ku retinat kanë filluar të zgjedhin me nge
mise nga çatia lart…
… e pastaj sikur nënshkruhen një pakt
të bëj rroje vetëm një Sy në fakt…
Sarandë, Syri i Kaltër, 2019
