top of page

ATJE...!





Atje më presin gërmadhat e shtëpisë

dhe dallëndyshet që vijnë përherë e më rrallë

Më presin nën dhè zambakët e vdekur

dhe hijet e të parëve ende gjallë...


Kalldrëmi pret që të m'i puthë këmbët

kodra që heshtur m'i ruan kujtimet

arna e qiellit, hardhia që qan

dhe porta qemerëlartë e diellit


Më presin pemët që s'i mbajnë më frutat

oborri ku dikur ulej perëndia

Më pret hija e qenit që u sëmur prej mërzisë

kur u largova nga shtëpia


Nëna më pret e lutet me psalme

kur muzgu shtrin krahët mbi qytet

zhaurima e detit, tufanët e rreptë

dhe pusi plot brenga e dert.


Pulëbardha varrosur brenda një vale

burimi me mijëra shtëmba thyer

kujtimet burgosur brenda një fjale

dhe lumi që shkon për t' mos u kthyer


Pikëllimi ulur më pret mbi gurë

heshtja nëpër gërma tashmë thinjur

pemët me buzët që dridhen në ethe

dhe ëndrrat me gjethet gremisur...


Atje, më presin gërmadhat e shtëpisë,

dallëndyshet që vijnë përherë e më rrallë

Më presin nën dhè zambakët e vdekur

dhe hijet e të parëve, gjallë...

34 views0 comments

Comments


Shkrimet e fundit

fjalaelireloadinggif.gif
bottom of page