Vendi im me biberon…
(unë jam tradhëtarja e të gjitha qeverive. më paçin halë në sy! - i.s)
~~~
***
Atdheu im jeni ju…
atdheu im je ti,
bebja e sapolindur,
paçka se uaaaaaa-në
te buzkat e njoma,
ta “vulosin” me biberon,
edhe pse me qarje
kërkon thithkën e gjirit të nënës…
nga thatësira e trupit të saj
të paushqyer, për trashëgimi, qumështi i mungon,
…
atdheu im je ti, vajzë a djalë
që dashuria të dridhet në ëndrra
dhe mbete me “biberon” pikëpyetjesh në mendime,
pa u rritur për t’u përkëdhelur
nga e ardhmja!
…
(atdheu je edhe ti, pushtetar
që biberoni të mbeti i ngjitur te fjala…
dhe kolltuku t’u bë sindromë.)
…
atdheu im i virgjër jeni ju,
martirët e të gjitha kohërave,
pa “biberon” në fjalë e në shpirt!
…
atdheu im, jeni ju, bashkëkombas,
që e morët vendlindjen me vete
dhe botës i thatë:
- mëmëdheun e bëjmë edhe këtu,
si gjithë bota…
…
atdhèu im je ti, at-mëmëdhèu im!
~~~
iliriana- sot e përgjithmonë
brooklyn, ny, 20 janar, 2023
( vo: - mos e lexoni si poezi të mirëfilltë, ju lutem! është fjala ime e vërtetë, që, padashje rradhitet e vargëzuar…)
Comentários