Fatmir Terziu
… aq më shumë prej dhéut
që kumtet dhe zbutet pa e prekur thelbin e jetës
të gjitha janë arsye
ndikime që dalin nga realiteti
një pamje e gjeneruar para syve
më e madhe se qasja e një Toke, Qielli a Deti…
…dhimbja s’është gjerbje në paletat e një ene
nuk mbetet pika që i shtrydhet një strehe
pika e strukur brenda një vene…?!
…mos prisni të fsheh se është Qiellore
para saj meket e gjithë ndjesia
mërmërisin buzët sa arrijnë krisjen e lëkurës
grimë përkore
dhimbja …gjithnjë është një nga ato dhimbjet
që theksohen jo vetëm me zanore…
… unë u ngjaj dhimbjeve të tua
nuk jam katarakti
jam etja
para etjes ndjej lëvrima trupi
shkëpus dihama nga vetja
i shtrëngoj me Fjalën tënde që mos më humbi
mbi lumenj shirrash të tjera.
