LIRIKA NGA MYSLIM MASKA
Shkëputur nga libri i ri per botim.
ZOGJTË…
Sa doli nga çmendina,
I bertiti Erës me sa fuqi kishte:
Të lutem,
Të lutem shumë…
Mos qaj nëpër pyje
Se do më trëmbësh zogjtë
Që këndojnë brenda meje…
I VARURI…
S’të mbyt litari;
As karrigia që të heqin poshtë këmbëve,
Por FAJI…
UNË TË DESHA SI DY SYTË E BALLIT
Unë te desha si dy sytë e ballit
Më betoheshe Ti për Perëndinë
Por nuk paska fund mallkim i djallit
Varr na e bëri dashurinë.
Kam merak si shkon me atë tjetrin
(Nëse rron je gjallë në këtë botë)
Janë të bukur yjet e mëngjesit
Por dhe mbrëmja ka yje magjiplotë…
TË STOLISI ZOTI…
Të stolisi ZOTI me rreze ylberi
Aq sa dhe të vdekurit i ngrite nga varri
Se ç’mi vdiqe fare, çunat që të deshnin
Ishe edhe mbete lule jargavani…
TI SHKELJE MBI RREZE HËNE…
Ti shkelje mbi rreze hëne
LOZJE QESHJE nëpër yje
Thashë nuk është çupkë nëne
Është bijë Perëndie.
Dhe nata qe e lyer me hënë
Kur zgjata duart që ta puth
U vesh bota me Argjënd
Fatkeqësisht isha në gjumë…
