Poezi të shkruara në vitin e mbrapshtë
Nga Sakip Cami
1. Sfidë
Gjithçka rreth meje e brënda meje përpëlitet
Unë jetoj duke sfiduar
Sfidoj trishtimin
Gëzimin pa shijuar
Mbi jetën time, i forti, hajduti, i poshtri
Ngre jetën e tij
Por unë dhe ti
Së bashku i bëjmë sfidë
Së bashku …
2. Mos u dëshpëro o njeri !
Nëse në jetë dështon një herë
Mos u dëshpëro !
Çdo hidhërim një rrugëdalje e ka
Një dritare e re që hapet
Një ëndërr që pret
të bëhet realitet
Ka një zemër që të fal dashuri
Ka një dorë që të zgjatet
Ka një Zot që të përkrah
Ka një çast të lumtur njeriu
Një ide prej gjeniu
Rrëmbeje
3. Shpirti i poetëve
Eh, ç’shpirt të plasur paskan patur poetët
Kurrë, një herë nuk u kënaqën.
Eh, ç’shpirt të pasur paskan të shkretët
S’e mbajnë për vete, të tjerëve ua falën.
Eh, ç’shpirt të pastërt paskan patur poetët
Nuk i shteruan vargjet, dashuri falën.
Eh, ç’shpirt të madh paskan patur poetët
Ata nuk përkulen, mbi supe botën mbajnë.
4. Fat apo marrëzi ?
Mbjellim grurë, grurin shkelim
Shkollë duam, librat djegim
Në kishë venë dhe s’besojnë
Me sy nga qielli vetëm presin.
Për një gardh, vrasin vëllanë
Për një plesht djegin jorganin
Nëpër botë pastrojmë kanalet
Po e lenë të gjithë vatanin.
Kemi det e kemi male
Kemi fusha e minerale
Kemi fat, por jemi të marrë
Të gjithë duam të jemi të parë…
5. Me kë je ti ?
Në të majtë ekstremistë
Në të djathtë ekstremistë ndesh
O me mua, o kundër meje
O me ne, o kundër nesh
Me kë je ti ?
Jam me Shqipërinë
Shqipëria jemi ne
O me ne, o pa ne ?!…
Me kë je ti ?
Me kë je ti ?
Parti të tilla u shofshin
Parti ime: Nëna Shqipëri
6. Llogari e vështirë
Të numërosh shqiptarët është e lehtë
Se ata, shumë nuk janë.
Të numërosh të vdekurit, të vrarët,
të mbyturit, të plagosurit
Është e vështirë se ata, shumë janë.
Të evidentosh vrasësit dhe viktimat
Sa e lehtë, po aq e vështirë
Se ata një gjak kanë.
O Zot ! Ruajna mendjen !
Mars 1997
7. A erdhi sivjet pranvera?!
Në këtë mars nuk çelën lulet
U trembën nga krismat e armëve
Fëmijëve u munguan pekulet
Se nënat nga mandatet u tmerruan
Avionë më shumë se sa zogj
Në qiellin e Shqipërisë
Dallëndyshet nuk u kthyen
A erdhi sivjet pranvera?!
Mars-maj 1997
