Nga Petrit Malushi
“U çmend !!” ...
Thonë për dikë u çmend
Se nuk mban mend i ngrati.
Ngatërron rrugicë e vend
Kur zbret shkallët nga pallati.
Dhe nuk thonë kurrë u çmend
Për një kopuk pushtetar,
Për një folës në kuvend
Që zhurmon si në pazar.
Pa përtesë u çmend thonë,
Kur dikush me vete flet
Nga hallet që ka, rënkon.
Harruar prej babait shtet.
Por u çmend kurrë nuk thonë
Për një vrasës, një hajdut,
Për një, që në tij pronë
Pjesë nga det e qiell fut.
U çmend thonë për dikë
Se padrejtësinë e çjerr.
Të palarat një nga një
Si simite furri nxjerr.
Nuk thonë për disa kodosh
Që trazojnë edhe të vdekur.
Zyrtarë rrufjanë, kokëbosh
Mashtrues, gënjeshtarë të thekur.
…………………………………………………..
Thonë u çmend për të vërtetën
Kur del përmbi llumin pis.
Por nuk thonë për gënjeshtrën
Tek shëtit serbes si “mis”!
Raki rrushi
U poq rrushi ! Në ditë-vjeshtë
Prej hardhisë varur te lisi
Dhe prej shtratit shtrirë në vresht,
U shkëput e rrugën nisi.
Shkoi te kadia grykëgjerë
Zbrazi lëngun, shkumoi mushti,
U bë bërsi, lëshoi erë
Për t’u zier ditët i mbushi.
Aty pranë kazani i larë,
Si “usta” fundkallaisur
Mbushet dhe ulet mbi zjarr,
Llullanë e gjatë për ta dirsur.
Pikë-pikë lehonë rakia
Shishet mbush e ndonjë gotë
Të fton ta kthesh dhe zjarrmia
Turbull t’i bën sy e kokë.
Pa, një shok a mik kur vjen,
Me dëshirë më tepër pi.
Pas dy gotash, të rrëmben
Në të tretën ngre dolli !
Comments