Qeparo

1.

Zogu i Butrintit

Nga Fatmir Terziu

Në sqepin e ngrirë,

në heshtje në ngjyrimin tënd,

në një kristal që na bën më afër

përhumbem brenda një miti të largët

dhe vetëm Ti,

vetëm Ti, mund të më seleksionosh fjalët.

Një zog si ty mbetet gjithnjë në pranverë

si një enigmë

sytë mbajnë brenda tyre sekretet e kohërave

një puthje mbështjell ylberin në gji

bie shi,

shih…, dhe në ata sy.

Mbi guralecë

zbrazet historia nga kapakët e padukshëm

por krahët janë zvetënuar

në baticat e thella

kur cicërrima jehon në shtrojën e vetmuar

mendja rishkruan vargun e munguar

pa laps në duar.

Ti mban motesh një lule në sqepin e ngrirë

u jep bekimet atyre që të vijnë për vizitë

me pjesën tjetër trupi yt flet më mirë,

për fatet e dashurive në Butrint.

2.

Shi në Llogara

Dhe ti zbret. Dhe zbret

në këtë të vërtetë të ethshme

që lëshon litarët e vet për të prekur, kaltërsi, baticë,

ndërsa mendimet prekin atë që lënë pas sytë,

vetëm për të ndjerë një grimë në sy:

le të bjerë ai shi i imët

le të bjerë si begonjat që varen nën çati.

E mesazhi të zbret në celular në dy gjuhë,

i lagur dhe djegur nga valët,

mbart këtu dërgimin e fraqtë veri,

mbart fjalën,

për modelet e shiut të gjuhëve që u përhapën

dhe ti me gisht e zgjedh të parën,

çfarë ndodh. Dhe ajo

është ajo që na vjen,

na flet,

dhe na kap për shpatulla,

ajo që na dridhet dhe na bërtet nën shi,

është horizonti i tretur

për një gjuhë të pastër aty.

Në Llogara,

gjuhët mbetën duke u trazuar si në një çorbë,

përballë kësaj gjuha shqipe qëndron e fortë,

patjetër,

askush nuk do që ta dëgjojë gjuhën tjetër.

Kjo e vërtetë e errët, kjo mendësi e pabindur

si pëshpërima e bulkthave të pafund,

të gjithë duke alarmuar rrugën e syve,

për të thënë në heshtje jo më ndërhyrje gjuhe si kjo,

le të bjerë shiu në ndërhyrjen brutale të gjuhëve

le të vazhdojë t'i shpëlajë ato.

3.

Qeparo

Ndërsa dëgjova rrëfimin e Dukeshës Camilla

fjalët e saj të bukura u pagëzuan nga kopshtet,

me një aromë të lashtë lirie,

duke mbjellë historinë e Bregut me lule

për vargjet e kësaj poezie.

Mijëra fjalë të tjera dilnin në korr

mbi një varkë të ankoruar nga mitet

gruaja e Princit anglez në Qeparo

prej fjalës së saj vetvetiu ngjizej,

një bukuri që kurrë s'e harron.

Dhe kështu u dëgjua në UNESCO,

një fjalë mbretërore si kjo

i bukur është ky Breg i Detit

i bukur është Qeparo!

Shënim: Pak kohë më parë u mblodh në Qeparo „gjysma e ekonomisë Europiane“, ku ishte e pranishme edhe Dukesha Camilla Parket Bowles, bashkëshortja e princit Charles, kandidati i parë për Mbret i Britanisë së Madhe.