PASOJA NGA XHUPI "MODERN"


Pierre-Pandeli Simsia

Ai sapo kishte përfunduar studimet e larta dhe ishte diplomuar për ekonomi financë; u emërua ekonomist në një nga degët e ndërmarjes së qytetit ku ishte lindur dhe rritur.

Kishte një pamje të jashtëme tërheqëse dhe, si djalë i ri në moshë i pëlqente të vishej bukur dhe me shije edhe pse në atë kohë, edhe veshjet e trupit ishin me "tollona" ashtu siç ishte në përgjithësi ekonomia shqiptare; kohë tollonash në fundvitet 80-të.

Si djalë i ri në moshë, i sapokthyer nga kryeqyteti i kishte ende të freskëta kujtimet e bukura nga jeta studentore në Tiranë.

Punësimi ekonomist finance në atë ndërmarrje të qytetit të tij e bënte të dukej serioz, si në punë, ashtu edhe në paraqitjen e tij të jashtëme.

Emërimi i tij ekonomist, nuk u mirëprit nga vetë përgjegjësi i degës së ndërmarrjes si edhe nga ekonomisti ekzistues.

I pari ishte i ardhur në atë qytet nga një fshat i largët i një qyteti tjetër, me arsimin 8-të vjeçar.