PARRËNJËSI

PARRËNJËSI

Mua më janë sosur mendimet

Ngase e zeza mbetet e zezë

Sado që mundohem ta mendoj të bardhë?

Falja nuk bëhet me vetdëshirë

Kur e ndërron atdheun për më shumë lodra.

Merrë parrënjësinë dhe shumë varre për të vizituar.

Lodrat nuk ngushëllojnë netëve

kur mendimet fermentohen, e g.u.f.O.J.n.ë

Kurrë nuk kam zgjedhur vend për vete,

dhe as që kam menduar ndonjëherë

se çfarë do të ndodhte sikur të isha mbytur

në afërsi të detit Mesdhe.

Heret a vonë njeriu e gjen rrënjën e vet,

por kur e ke humbur garën në vrapim gjashtëdhjetëmetërsh drejt së ardhmes,

atëherë e kupton se kjo gjë është goxha e pashpresë.

Mua më janë sosur ndjenjat

Një hartë në dorë

Dhe nuk e gjej dot shtëpinë.

©Yllka Sheqiri