PANAJOT BOLI: NDOFTA JAM I LODHUR UNË...

NDOFTA JAM I LODHUR UNË...

NGA PANAJOT BOLI

Sa i bukur më dukej në qiell i miri diell

Si një fëmjë i qeshur terë gaz

E agu si shtojzovalle përmbi lumë...

Pse më ngjan tani i mënduar dielli

E agun e shoh terë merzi?

...Ndofta jam lodhur unë

Stinët si vajza kalëronin hënën e yjet

Ah, ajo pranvera me lule në buzë

Si e marrë më dashuronte shumë...

Si m’u lodhen tani stinët e mira

E pranvera si e trembur më rri?

...Ndofta jam lodhur unë.

Buzëqeshje të ëmbël kishin sytë e njerezve

Hambar shprese me shpirtin në blerim

Gjethe dafine hidhnin mbi dhunë...

Si u zvenit tani buzëqeshja e tyre

E ngeli shpresa e shastisur?

....Ndofta jam i lodhur unë