PËLLUMBAT E MURMË



    Thani Naqo

    PËLLUMBAT E MURMË

    Gjithësia u zhyt në mugëtirë,

    pëllumbi i murmë shuan me krahë kandilët e yjeve.

    Ai lëpin buzët e veta,

    lyer me njomështi ëmbëlcake dhe të kripur.

    Ajo kthen e vërtit rrobat e nderura përqark stufës,

    dy fole kanarinash ia mbulojnë gjinjtë e zhveshura.

    Nuhat symbyllur këmishët me jaka të shkërmoqura nga përqafimet.

    -Edhe sonte do shikoj ëndërr me trendafil,

    - tha e qesh e tej lumturuar.

    Palos një mbi një çorrapet e ngrohta,

    (nga ato që vesh dimri i varfër,

    arnë mbi arnë,

    në pllaze e thembra.)

    Lëvizjet magjike,

    të gishtave e krahëve,

    shtrojnë flokët dhe palosin të tejdukshmet,

    që vesh për gjumë e për festë femra.

    Në ëndrrën e mëngjesit trupin ai e kish të pendosur,

    pëllumb i murmë ndizte kandilet e yjeve.

    Ajo mbante në sqep gonxhen e porsa çelur

    dhe ëndrra aromonte trendafil.

    2020


    #thani #naqo

    11 views

    Shkrimet e fundit