NDËRRON JETË BASHKËVUAJTËSI IM ALI ALLA
Nga Bedri BLLOSHMI
Të enjten më 20 prill ndërroi jetë në moshën 94 vjeçare Ali Muharrem Alla, miku i familjes Blloshmi nga fshati Funar i Elbasanit. Po kush ishte Ali Muharrem Alla Ali Alla ishte pinjoll i familjes nacionaliste, patriotike që ka dhënë gjak për Shqipërinë. Siç dihet të gjitha ato familje që e donin Shqipërinë dhe që kishin luftuar për ta mbrojtur territorin e saj nga fqinjër grabitqarë, nuk do të falen kurrë nga komunistët. Familja e Ali Allës, ashtu si mijëra familje të tjera nacionaliste u shkatërrua nga regjimi komunist duke i çuar në litar, plumb burgosje e internim.
Në vitin 1949 terroristët komunistë në bashkëpunim me Sigurimin do të shkonin të arrestonin Muharrem Allën, bashkë me dy djemtë e tij, Alinë dhe Bajramin. Në qytetin e Elbasanit regjimi krijoi një “grup”, me kundërshatarët e regjimit, i cili u quajt grupi i “Rezistencës”. Pas shumë kohësh torturash në hetuesi, vëllai i Aliut, Bajrami dha shpirt në birucat e Elbasanit. Muharremi u dënua me puishkatim, ndërsa Aliu u dënua me 10 vjet burg. Pasi doli nga burgu, në vitin 1973 i hedhin përsëri prangat dhe e dënojnë me 7 vjet burg. Kur vajta në Spaç në vitin 1978, njeriu i parë që më përkrahu dhe më dha kurajo ishte Ali Alla. Ali Alla ishte një burrë shumë i zgjuar, i edukuar me frymën e atdhedashurisë dhe i qetë në biseda. Rreth vitit 1979-1980 në Spaç vjen edhe vëllai i tij, Dalipi. Në fund të vitit 1981 Alinë e liruan nga burgu. Aliu kur shkon në shtëpi gjeti gjithçka të shkatërruar. I lodhur dhe i dërrmuar, me një shpresë të vakët, shkon të punojë në gurore. Aty merrte sa për të mbajtur frymën gjallë. Në vitin 1990, pas ardhjes së demokracisë, Aliut i dhanë një shtëpi, por ai nuk mundi të krijojë familje, ndaj jetoi me gocën e motrës së tij që i shërbente. Aliu kishte ardhur edhe në shtëpinë tonë në Bërzeshtë. Para tre vjetësh i shkova për vizitë në shtëpinë e tij, ku e gjeta shumë të lodhur dhe të dërrmuar. Sapo më pa mua, u gëzua dhe shpërtheu në lot. Pasi u çmallëm u largova pa e ditur se nuk do ta takoja më. Pushofsh në paqe miku im!
