Mihal Gjergji: BILBILENJTË

" Doli nëna në sofa..."

Vështron lugjeve përpjetë

"O Bilbil, ç'janë ata?"

Festekuqë e të pabesë!

I mbushen brazdat mbi ballë

Me brazimë nga borë e shkurtit

-Unë jam Bilbili me pallë

U bëj vend brenda tabutit...!

"Apostujt"- dorën te palla

Bilbili, si Krisht në krye

Rëndon gjumi mbi qepalla

Ndrijnë trembëdhjetë yje

Fermani shpallet te sheshi

Nga pashallarët me tuje

Zbret furtunë e Kurveleshit

I flet Janinës me kuje...!

"Dale bej, të dredh cigarë!"

Pa shiko si qajnë retë...!

"Nuk jam çanaku me dhallë"

Era puthte fermeletë...

Udha nxin prej suvarive

Turma frymën mban e mekur

Gjarpri i zi i osmanllinjve

Na shkurton jetën e mbetur

Më rrëmben një këngë me vete

Janinës, sytë ç'i panë?

U drodhën foshnjat në djepe

"Vanë Bilbilenjtë, vanë!"

Janinë, Tetor 2017