Lela Dardha Kokona: Helena ime, udhë të mbarë drejt dijes dhe ëndrrave

Këto ditë, kur ti, mbesa ime, po përgatitesh të nisesh drejt Francës, në qytetin e bukur të Grenoble-it, zemra e gjyshes sate është mbushur me një krenari që vështirë të shprehet me fjalë.

Ti nuk po nisesh thjesht për të vazhduar një master. Po nis një kapitull të ri të jetës, një rrugëtim drejt dijes, ëndrrave dhe së ardhmes që e ke ndërtuar me punë, këmbëngulje dhe përkushtim.

Mbesa ime, fakti që fitove të drejtën për të vazhduar masterin si studente ekselente dhe se të është akorduar edhe një bursë, është një vlerësim i madh për atë që je dhe për gjithçka që ke arritur. Është një arritje e jotja, por njëkohësisht edhe një gëzim e krenari e madhe për të gjithë familjen.

Unë, si gjyshe, do të të përcjell me bekimin tim dhe me një dëshirë të vetme: mos e humb kurrë etjen për të mësuar, modestinë për të dëgjuar dhe guximin për të ëndërruar.

Rruga që po merr do të të çojë drejt njerëzve të rinj, kulturave të reja dhe sfidave të panjohura. Mos u tremb prej tyre. Çdo vështirësi do të të bëjë më të fortë dhe çdo sukses do të të kujtojë se sa larg mund të arrijë një vajzë që beson tek vetja.

Grenoble-i le të jetë për ty më shumë se një qytet ku do të studiosh. Le të bëhet një vend ku do të rritesh, do të zbulosh veten, do të pasurosh dijet dhe do të hapësh dyer të reja për jetën.

Shko, Helena ime, me kokën lart dhe me zemrën plot. Dija është një pasuri që askush nuk mund të ta marrë.

Dhe kur një ditë të kthehesh, me më shumë dije, përvoja dhe kujtime, dije se këtu do të jetë gjithmonë një gjyshe që të ka përcjellë me dashuri, të ka pritur me mall dhe do të jetë gjithmonë krenare për ty.

Udhë të mbarë, ylli im!

Paç dritë në çdo hap, sukses në çdo përpjekje dhe bekimin e Zotit në çdo rrugë që do të marrësh.

Helena ime, ec larg, por mos i harro kurrë rrënjët e tua! Sepse mund të shkosh larg në botë, por vlerat që të bëjnë të veçantë i merr me vete nga rrënjët e tua, nga familja jote, nga dashuria dhe edukata që ke marrë.

Dhe, së fundi, uroj që një ditë, kur të jesh bërë një grua e suksesshme, ta kujtosh këtë fillim dhe të thuash me vete:

“Atëherë gjyshja ime më përcolli me fjalë, me lot gëzimi dhe me një besim të madh tek unë. Dhe ja… ia dola, o nënë!”

Kujtim nga nëna Lela Dardha Kokona