Kozma Gjergji: UDHË TË MBARË MIKU IM MYSLIM MASKA!

        Më tronditi e pikëlloj pa masë lajmi i papritur për ndarjen e parakohëshme nga jeta të mikut shumë të çmuar, poetit, prozatorit, përkthyesit, Myslim Maska. 

        Pengu e rëndesa më shtohen edhe se, që kur morëm mërgimin e u shkëputëm nga njëri-tjetri, dhe pas vitesh u rilidhëm, s'arritëm të takoheshim e çmalleshim për së afërmi. 

        Myslimi është një ndër miqtë e mi të afërt të kohës së rinisë. Na njohu e lidhi fort pasioni i madh për letërsinë, përpjekjet për të njohur e përvetësuar mjeshtërin artistike të fjalës. 

        Qysh atëherë Myslymi shquhej për kulturën e dijen e gjerë, për kërkesa të larta në krijimtari, për prirjen artistike e të zotërimit të gjuhëve të huaja, dhe që përmes përkthimeve na “gostiste” bujarisht me perla të artit botëror. 

        Rrallë gjen si tek Myslimi aq të harmonizuar Njeriun, Artistin, Intelektualin. Kurdoherë në anën e së mirës, humanizmit, njerëzores, të vlerave më të larta e progresit, dhe  gjithmonë i gatshëm për të ndarë edhe kafshatën. 

        Të tilla virtyte tretur në një pafundësi mbresash e motivesh nga jeta, talenti i tij i shndërrojë në ujëvara e dallgë lirike që përshkojnë vargjet e prozat e tij cilësore. 

        Do t’i lexojmë hera-herë ato, e kështu herë-herë do të takohemi, bashkëbisedojmë, çmallemi dhe e kemi përherë mes nesh Myslimin tonë të paharruar. 

        Udhë të mbarë i shtrenjti Mik! 

        Të dashur e respektuar Valentina, Laura, Orges, jemi me ju edhe Unë e Natasha në këtë kohë tepër të vështirë, dhe lutemi që të keni forcë dhe kurajo në përballimin e dhimbjes së madhe. Ju shprehim ngushëllimet më të thella juve dhe gjithë të afërmve tuaj! 

                           Përqafime, Natasha e Kozma Gjergji 

                                  Venecia, 4 Mars 2026.