KANIBALIZMI PO HA NJERËZIT TANË


Vullnet Mato

Vullnet Mato

KANIBALIZMI PO HA NJERËZIT TANË



Qysh prej një shekulli më parë,

po na kafshon kanibalizmi politik.

Mijëra njerëz të lënduar e të vrarë,

me dhëmbë ligjesh të padrejtësisë.

Kanibalizmi i agjitacion-propagandës,

hëngri për fjalë goje, mijëra shqiptarë,

kalbi në kampet e barakave të baltës,

përtypi të pushkatuar, mbetur pa varr. 

Kanibali shtatëmijë e pesëqind e njësh,

hëngri njerëz për një pëllëmbë tokë,

dhe vazhdon me shembje shtëpish,

ku me çataj ligji, kafshon e ha kokë.

Po përsëritet thënia dikur e Konicës,

se shqiptari, ka kanibal, shqiptarin,

dhe do të derdhen lotët e mamicës,

sa të zgjedhim në krye antiatdhetarin.

Kanibalizmi ka dhëmbë shkopin e gomës,

ka dhëmballë bombat me gaz lotsjellës,

ka birucën me hekura, në vend të gojës,

pasi arma e hakmarrjes, ka ngrënë njerëz.

Kanibalizmin na e pjell antihumanizmi,

që po na ndjek, si mallkim prej vitesh,

filloi me luftën e klasave nga komunizmi,

dhe mbeti trashëgim, si vazhdim ritesh.

Deri kur ne do të jemi, vend me kanibalë,

dhe do kërkojmë Evropën për strehim?

O turp i turpeve, me ligjvënës të marrë,

O krim i krimeve, nga na duhet shpëtim!

#Vullnet #Mato

5 views

Shkrimet e fundit