Nga Petrit Malushi
Ikje, trishtim !...
“Ikje”, … fjalë e rëndë, shkëmb i zi :
Për në Kanada dy kolegë emigruan,
Tre miq të mirë për në Itali,
Dy të tjerë në Gjermani qëndruan…
“Ikje“, … si rrjedhë uji që nuk ndalet :
Herët, ca të njohur Greqinë “pëlqyen”,
Në Angli shkoi një shok “të heqë hallet”,
Prej Zvicre, në Francë ca të tjerë u kthyen.
“Ikje”,… sjell e lë pas trishtimin, mal :
Një fqinj fluturoi për në Amerikë,
Për në Australi ai që pata përballë,
Një shok fëmijërie ndali në Afrikë…
Si zogjtë në fundvjeshtë lënë foletë
Të rinj, moshë e mesme, të moshuar
Endërrthurur për një më të mirë jetë…
“Ikje”, trishtim…plagë që s’ka të mjekuar !
