Halil RAMA: ELMAZ LALA - PROFILI I I INTELEKTUALIT ME KARRIERRË TË SHKËLQYER

“QYTETAR NDERI” I DIBRËS, TITULL I MERITUR PËR ISH-SHEFIN E SEKSIONIT TË ARSIMIT TË RRETHIT MË TË MADH VERILINDOR

ELMAZ LALA - PROFILI I I INTELEKTUALIT ME KARRIERRË TË SHKËLQYER

PROFESIONALE, DREJTUESE DHE POLITIKE NË GATI GJYSËM SHEKULLI

Halil RAMA – Mjeshtër i Madh

·      Dyzetetetë vjet kontribut pa ndërprerje, si mësues, drejtor shkolle, inspektor e kryeinspektor në Seksionin e Arsimit e Kulturës dhe Drejtor i Drejtorisë Arsimore Dibër (1972-1991), si veprimtar i shquar politik e shoqëror dhe si kuadër i rëndësishëm, deri në piramidën e shtetit shqiptar, e rendisin Elmaz Lalën me elitën dibrane e atë kombëtare…

Është pikërisht kjo karrierë e shkëlqyer që motivon dhënien e titullit “QYTETAR NDERI” I DIBRËS”, Z.Elmaz Lala, nga Këshilli i Bashkisë më të madhe Verilindore të vendit, “Për kontribut të spikatur në fushën e arsimit dhe drejtimin e institucioneve arsimore, për profesionalizëm, integritet dhe përfaqësim dinjitoz si i zgjedhur në shërbimin publik, me fokus të veçantë rritjen e cilësisë së arsimit në Dibër e Tiranë”.

Në ceremoninë e dhënies së këtij titulli nga kryetari i Bashkisë Dibër Z. Rahim Spahiu, salla “Eqerem Çabej” e Akademisë së Shkencave Tiranë, kurrë nuk ka qenë më e tejmbushur se sa më 18 tetor 2025, nga qindra përfaqësues të elitës dibrane nga Peshkopia e Tirana, miq, shokë dhe të afërm të Elmaz Lalës, të pranishëm në këtë event mbresëlënës.

Karriera e tij mjaftë e pasur intelektuale, profesionale dhe vlerat njerëzore, në këtë takim mbresëlënës i evidentuan më së miri ata që kanë punuar dhe e kanë njohur më nga afër atë.

Vetë kryebashkiaku Spahiu – i vlerësuar nga masa e gjerë e dibranëve dhe nga institucionet qëndrore të shtetit, për përkushtimin dhe vizionin bashkëkohor me të cilin drejton Bashkinë e Dibrës, duke ndikuar drejtpërdrejt në realizimin e një progami zhvillimor ambicioz në çdo njësi administrative të saj, ndërsa i dha titullin, tha se intelektualë si Elmaz Lala janë nderi dhe krenaria e dibranëve.

Në këtë event (të moderuar mjeshtërisht nga aktori, regjisori dhe skenaristi Llesh Nikolla – Mjeshtër i Madh), Dali Horeshka, një nga këshilltarët më të afërt të kryebashkiakut të  Dibrës Rahim Spahiu, vlerësoi Z. Elmaz Lala, “…Një personalitet që ka dhënë një kontribut të veçantë në jetën publike, kulturore, sociale e veçanërisht në atë të Arsimit dhe të Administratës Publike të nivelit lokal e atij në shkallë vendi, si përfaqësues në këshillat bashkiake në Dibër e Tiranë për rreth 25 vjet dhe që me punën, rezultatet dhe me shembullin e tij ka nderuar jo vetëm veten e familjen, por edhe komunitetin tonë dibran”.

Vlerësime maksimale për këtë dishepull të dijes dhe progresit shoqëror shprehën gjithashtu edhe Z. Kadri Rrapi, akademiku Adem Bunguri, Zabit Lleshi, Liri Rasha e Mehmet Hasani.

Dhe ndërsa Prof. Bunguri solli mbresa nga jeta studentore e përbashkët me Elmazin dhe disa sutudentë të tjerë nga Dibra,  Zabit Lleshi, ndër të tjera tha se “Elmaz Lala, i biri i Mehdiut, lindur më 1955 në Reçin e qëndresës, të kullave, bujarisë, mikpritjes e besës, në Reçin, një nga Nandë Malet e Dibrës, mbart në kurriz histori të mëdha që të frymëzojnë…Ai ka lënë gjumë në historinë e Arsimit në Dibër, ku me siguri do të zërë një vend të veçantë, si rezultat i një pune të ndershme, me vullnet plot pasion, drejtues i aftë, serioz e me vizion”.

Impresione ngjalli tek qindra të pranishmit edhe Liri Rasha (që siç tha kanë lidhje gjaku me Elmazin) , jo vetëm me fjalën e saj të ngrohtë e plot dashuri, por veçanërisht me interpretimin mjeshtëror të këngës “Amaneti”.

Po ashtu u duatrokit ngrohtësisht edhe e bija e Elmazit, Ernesta që kishte ardhur nga Italia për të qenë e pranishme në këtë vlerësim meritor të babait të saj nga Këshilli i Bashkisë Dibër.

PAK NGA CV E ELMAZ LALËS…

Bazë e arritjeve të Elmaz Lalës, janë përgatitja e tij e lartë profesionale, si dhe vlerat njerëzore e intelektuale që mishëron dhe përçon në shkolla e institucionet tjera arsimore e shtetërore të rëndësishme.

I diplomuar me rezultate të shkëlqyera në Fakultetin e Filologjisë, dega Histori-gjeografi të Universitetit të Tiranës (1973-1977), me specializmin pasuniversitar të Pedagogjisë e Filozofisë dhe me dhjetra trajnime brenda e  jashtë shtetit (në vende të BE), ndër të cilat 30 trajnime të ndryshme për reformën në administratën publike, organizuar nga Komisioni i BE,  Elmaz Lala do të ngjiste shkallët e karierës, deri Shef i Burimeve Njerëzore në Këshillin e Ministrave (2003-2007).  

Dijet dhe përvojën e tij të punës Elmazi do t’i materializonte edhe në drejtimin me kompetencë e profesionalizëm të lartë si Përgjegjës i Seksionit Social kulturor në Bashkinë e Dibrës (1993-1996); Përgjegjës i Sektorit të Kulturës, Rinisë dhe Sporteve në Bashkinë e Tiranës (2008-2011) dhe si drejtor i Drejtorisë së Trajtimit të nxënesve të shkollave të Mesme të Tiranës (1997-2002); Drejtor i Shkollës Speciale “Luigj Gurakuqi” Tiranë (2014-2020) dhe njëherazi pedagog i jashtëm në Fakuktetin e Infermierisë të UT (2016-2020).

Mendimin e tij profesional dhe kualitativ, si dhe ligjërimin politik,  Elmaz Lala do ta shfaqte dukshëm në harkun kohor të  17 viteve (1991-2008) edhe në funksionet shoqërore, si Kryetar i PS të rrethit Dibër, anëtar i Komitetit të Përgjithshëm Drejtues të PSSH, anëtar i kryesisë dhe Asamblesë së PS, Bashkia Tiranë; si anëtar i  Këshillit Popullor të rrethit Dibër, anëtar i këshillit Bashkiak të Bashkisë Tiranë (një mandat) dhe për tre mandate anëtar i këshillit Bashkiak të Njësisë Bashkiake Nr. 8, Tiranë.

KUR DREJTONTE ELMAZ LALA, ARSIMI NË DIBËR

NJOHU ZHVILLIM INTENSIV

Vlerësimi me titullin e lartë “QYTETAR NDERI I DIBRËS,”  parasëgjithash motivohet me faktin sepse Dibra në vitet ‘’90-të kur Elmaz Lala ishte Drejtor i Drejtorisë Arsimore, për të gjithë parametrat me të cilët  matej atëherë cilësia në arsim, ishte konkurruese në nivelet më të përparua në shkallë kombëtare.

Janë vërtetë frymëzuese arritjet e asaj periudhe në fushën e arsimit në Dibër, kur pati ritme të shpejta rritjeje në tërheqjen e fëmijëve në arsimin parashkollor, duke ngritur kopshte në shumicën dërmuese të fshatrave deri në skajet më të largëta, ndërkohë që në arsimin 8-vjeçar, në 76 shkollat e Dibrës, erdhi në rritje kalueshmëria dhe treguesit cilësor.

Dibranët nuk mund të harrojnë se ato kanë qenë vitet kur braktisja e shkollës, një gangrenë në rang vendi, ra ndjeshëm edhe si rezultat i bashkëpunimit të frytshëm me prindërit dhe organet e qeverisjes vendore.

Në harkun kohor të tetë viteve që Elmaz Lala drejtoi arsimin në Dibër (1983-1991, si inspektor, kryeinspektor dhe Drejtor i Drejtorisë Arsimore) pati masivizim të vrullshëm të arsimit të mesëm me shtrirjen e tij në të gjitha zonat e rrethit (27 shkolla të mesme gjimnaze e profesionale me orientim bujqësor-blegtoral e minerar).

Madje Dibra ka patur stabilitet në kalueshmërinë e studentëve të saj në arsimin e  lartë, duke lënë pas mjaftë rrethe të vendit, edhe të Shqipërisë së mesme. Ndaj nuk është rastësi që studentët dibranë të asaj kohe i gjen sot deri drejtues të lartë në instutucione  e dikastere qëndrore.

Këtij bilanci mjaftë pozitiv në zhvillimin e vrullshëm të arsimit në Dibër i shtohen edhe  ritmet e shpejta në shtritjen e gjuhës së huaj, kryesisht të asaj angleze, thuajse në të gjitha shkollat 8-vjeçare e të mesme të Dibrës. Ndërkohë u plotësuan gati të gjitha shkollat me specialistë të arsimit të lartë të profileve të ndryshme, duke liruar tërësisht kuadrin jo vendës (jabanxhinj)..

Një trasformim substancial u bë në fuqizimin e bazës materiale e laboratorike në shkolla e kësisoj Dibra ishte fituese e vendeve të dyta e të treta në oplimpiadat kombëtare të shkencave ekazakte, kimi-biologji-fizikë dhe në konkurset mes shkollave bujqësore të vendit.

Për këtë zhvillim të vrullshëm të sistemit arsimor në rrethin e Dibrës, Elmaz Lala ka të drejtë të ndjehet krenar, si drejtuesi kryesor i këtij sistemi në ato vite, si dhe për vlerësimin nga Ministria e Arsimit dhe Sportit me Çertifikatën e Mirënjohjes Publike për kontributin në arsim.

Në vitet e mëvonshme është vlerësuar me Çertifikatën e Mirënjohjes Publike për kontributin në arsim edhe nga Bashkia e Tiranës.

MODELI I NDËRTIMIT TË NJË FAMILJE SOLIDE

Vlerat dhe përkushtimi ndaj arsimit e edukimit janë të ndërthurura thellë në rrënjët e familjes së Elmaz Lalës. Nga shembulli dhe orientimi i tij prej intelektuali të mirëformuar e deri tek bashkëshortja shembullore Deshira Lala (Kuçi); vajza e parë Vojsava e diplomuar në Universitetin e Padovas, Itali-dega farmaci, aktualisht pedagoge në Brigham Young University, Provo, Utah – Usa; vajza e dytë Ernesta Lala, diplomuar në në Universitetin e Padovas, Itali-dega Ekonomiks (ekonomi aziendiale), aktualist Drejtoreshë Operacionale e një aziende HIMCO, Padova (prodhim këpucësh e konfeksionesh) me disa filiale në Itali; djali Marenglen, diplomuar në Universitetin e  Tiranës, Fakulteti i Shkencave Mjekësore dhe master shkencor për Administrim Spitalor (Aktualisht pedagog në Universitetin Aldent dhe Kryeinfermier i Sallave Operatore në QSUT, si dhe bashkëshortja e tij, Anileda Lala, diplomuar në Universitetin e Tiranës, Fakulteti i Ekonomisë, specialiste në Bashkinë e Tiranës (me nipërit e mbesat e mrekullueshme) krijojnë  një mozaik të pasionit për dijen dhe përkushtimin ndaj familjes e shoqërisë.

GËRSHETIMI I AFTËSIVE PROFESIONALE E VLERAVE INTELEKTUALE  

ME ATO TË KARAKTERIT

Te Elmazi janë  gërshetuar mjaft mirë aftësitë e  veçanta profesionale me ato të karakterit, si njeri i urtë, i qetë, gojëmjaltë, i ditur, i dashur me këdo, njeri që rrezatonte dhe rrezaton kudo kulturë, qytetari, dituri, mirësi, i cili të ngjall respekt.

Ai me punën plot pasion e përkushtim, sjelljen, urtësinë, komunikimin model me kolegët, nxënësit e banorët e Dibrës dhe pse jo edhe të Tiranës e nga e gjithë Shqipëria, ka lënë gjurmë të pashlyeshme, dritë e dije dhe mbetet në memorien e tyre një mësues e drejtues model.

Në simbolikën e tij spikatin dy cilësi themelore: Etika e jashtme, pasqyrë për t’u marrë shembull nga kolegët e punës e nxënësit si dhe zelli dhe përkushtimi për profesionin për të transmetuar saktë dijen, shkencën, kulturën.

Figurën e Elmaz Lalës e lartësojnë shumë cilësi, por ato që shfaqen më dukshëm, janë sinqeriteti dhe bujaria, mikpritja dhe dashuria që ushqen për të gjithë njerëzit.

Ai është një emër që ngjall respekt dhe mirënjohje në zemrat e atyre që e njohin, jo vetëm si një mësues i përkushtuar por edhe si drejtuesi që solli ndryshime të rëndësishme në botën e arsimit. Karriera e tij profesionale tregon një rrugëtim, nga sfidat e punës në shkollë e në Drejtorinë Arsimore, te sfidat akoma më të mëdha të drejtuesit në kohë të paqarta politike.

Elmaz Lala nuk është thjesht një bartës dijeje – ai gjithashtu është një personalitet që me shembullin e tij përçon kudo e ngado respektin dhe vlerat civile, duke ndikur në formimin, jo vetëm të individëve të zgjuar, por edhe të qytetarëve të mirë.

MIRËNJOHJA E “QYTETARIT TË NDERIT” TË DIBRËS ELMAZ LALA

Evente të tilla si ai i datës 18 tetor 2025 në sallën e madhe të Akademisë së Shkencave në Tiranë, zakonisht mbyllen me fjalën e mirënjohjes, nga ai që është protagonist i ngjarjes. Por, ajo (mirënjohja), si shprehja më e bukur e karakterit të njeriut, nga Elmaz Lala qe krejt e veçantë.

Pasi falenderoi përzemërsisht të gjithë pjesëmarrësit, me modestinë dhe thjeshtësinë që e karekterizon, u shpreh “falenderues, sidomos për faktin që në këtë organ të lartë të qeverisjes vendore (Këshillin e Bashkisë Dibër) tanimë ka djem e vajza të reja, që janë kujtuar e më kanë vlerësuar mua, a cilindo tjetër mes nesh, si dikush që ka vënë një gur apo i ka dhënë një dorë  zhvillimit e progresit të Dibrës, veçmas në sektorin e arsimit”. 

Ai tha ndër të tjera se ttradita në arsim ka në themel përpjekje brezash të përkushtuar, të shndrruar në pasuri kombëtare dhe në një forcë të bredshme që inspiron progres. Ndaj dhe është ndjerë krenarë për trupën pedagogjike të Dibrës, për ambicjen profesionale të saj, për kontributin e veçantë të saj këtu në Tiranë, Durrës e kudo gjetkë ku ajo u shpëngul në vitet e tranzicionit demokratik të vendit dhe që ja doli të bëjë diferencën me të tjerët.

Po ashtu ai ndau vlerësimin me parardhësit e tij (drejtues të arsimit në Dibër), të ndjerët Selim Alliu, Moisi Cami e Shemsi Manjani, me kolegët e nderuar  Beqir Sheu e Ramiz Lela, me inspektorët e Seksionit të Arsimit, të ndjerët Fitim Dani e Zabit Trupja, me kolegët e nderuar Dylbere Hoxha, Hysni Prifti, Fari Piperku, Zymbyle Zhulali, Syrja Stafa e Xhelil Imeraj.., me të gjithë punonjësit e Kabinetit Pedagogjik e drejtuesit e tij, Vangjel Petri e Astrit Gjunkshi; me grupin e aplikimit të Programit të ri, Mensur Murren, Hysni Çipurin e Nexhi Kumbaren.

Dhe padyshim, Elmaz Lala, tashmë “Qytetar Nderi” i Dibrës, do të shprehte falenderim të posaçëm për kryebashkiakun Rahim Spahiu. Kjo sipas tij për faktin se Rahim Spahiu “siç shfaq përgjegjshmëri të lartë në realizimin e detyrave që ka marrë përsipër, ashtu siç e ka ndarë mendjen të lërë gjurmën e tij në zhvillimin e Dibrës e progresin e pandalshëm të saj, ka vetëdijen të analizojë edhe rrugëtimin e bërë deri këtu, të vlerësojë kontribute të caktuara, të mos harrojë e madje t’i çmojë e sjell në kohë raporte pune e njerëzish, ato të bashkëpunimit në kohë të tjera, siç është edhe rasti i sotëm, rasti im”.