Duke thirrur Zotin…për 7 Mars
Nga Fatmir Terziu
Shkollari im është ende udhës
ka mbi tri dekada në autobus
duke hapur Abetaren mbeti rrugës
shkollat kanë vetëm një (re)kurs (!)
Nuk mund ta kapin atë sonte,
telefonat janë të zënë, linjat janë bllokuar
në këtë teletonelatë maratonë të kundërt
ku thirrësit janë mësuesit për nxënësit,
duke u lutur për autobuzë të tjerë nga Zoti.
Zoti është i zënë tani.
Për të lënë një mesazh pas tonit:
Shtypni 0 për edukim
shtypni 1 për shëndetin
shtypni 2 për strehim
(kujtesë: zëre radhën i pari për dimër)
shtypni 3 për këshillim
shtypni 4 për të gjitha sa më sipër…
… shtyp 5… shtyp 6 …
shtyp 7 … enkas për 7 Mars…
nëse jeni mësues, apo nxënës të shkoni në parajsë.
Fletorja është e bardhë për 7-8 mars
Nga Fatmir Terziu
Fletorja është e ngjeshur me shkrimin e parë (Nëna)
ledhatimi i saj i bardhë (brënda)
dhe shkrimi rrëshket mbi dërrasë
është ëndërra e parë
zgjohesh me urimin për 7-8 mars.
E bota të pëshpërit me zërin e botës,
ti i thua dora që shkruan është e imja
dhe fletorja,
dhe boja,
dhe mendja,
dhe goja…
janë të miat. Dhe hesht
pi deri sa ngrihesh një ditë dhe sheh
bulëzat e qumështit në buzët e tua
e tashmë se fsheh,
përtej çdo ëndrre,
këtu në këtë fletore jemi të gjithë krejt
vetëm një shenjë…Nëne!
Të tjera fëmijëri i rikthehen fletores,
të tjera ledhatime të bardha,
mes tyre lind, rritesh e bekohesh,
të ka mjaftuar vetëm Fjala,
deri sa të ikësh e të largohesh.
Fletorja është e bardhë duhet rishkruar (Nëna)
Loti të shëtit thellë në festën e madhe (ëndrra)
zgjimi është një dhuratë përtej çdo dhurate,
jo vetëm në këtë rast,
pse hutohesh, eja të urojmë:
askush nuk duhet të harrojë çdo 7-8 Mars!
