FESTA E ZEMRËS SË ÇBURGOSUR
- Prof Dr Fatmir Terziu
- Mar 22, 2022
- 1 min read
Poezi nga Kozma Gjergji
24 MARS 1999
Është datë e Festës të
Zemrës së çburgosur,
Është datë e Haresë së
Lirisë të çkryqëzuar,
E Fatit të Kosovës
Që shkruan armët e
NATO-s dhe UÇK-së…
24 Mars 1999
Datë e shenjtë
Në kujtesën e kombit.
FQINJI YNË
Ngaqë s'na e grabiti dot dhe detin
(Siç dihet nuk ka)
Krijoi detin e vetë përplot
Dallgë urrejtje, shpifjesh
Dhe stuhi mizorish…
Ç'det toksik!
Vështirë të lundrojë atje
Anija jonë e miqësisë!
S'MUNDEM
S'mundem kurrsesi t'i dëgjoj
Këngët e asaj lavdie
Të mbushur me krime!
NDJESA
Ndjesa si peceta,
Fshin vendin e pistë.
NJË PYETJE
Një pyetje Perëndisë:
Përse rruga e Shenjtorit
Çon në shkretëtirë?!
PARTIA
Qenka vërtet si lopa:
Dikujt i kthen brirët,
Dikujt i jep gjinjtë.
KOPEJA JONË
Kopeja jonë blegëritëse
Tmerrësisht e tmerruar
Jo më nga ujqërit
Por prej vetë barinjve.
NË ÇMENDINË
Këtu çdo pacient
Quan të çmendur
Vetëm të tjerët.
U KTHEVA
Pas katër vitesh plot
U ktheva
Në qytetin prindëror.
Ç'të shoh!
Varreza e zmadhuar
Sa për katër dekada.
Lotë më shkuan!
KAVAKU
Druri i gjatë e i drejtë
(Lakmonte lartësitë
Në kërkim të dritës)
Një ditë
Papritur u rrëzua.
Ja kishin pirë krejt
Gjakun e blertë
Parazitët e tij.
FUNDVJESHTE
Te këmbët e vidhit dhe pjergullës, që
Pleksur ngrenë statujën e një
Pasioni të madhë dashurie
Plot gjethe si bishta cigaresh
Nga trishtimi se po vjen dimri.
DASHURIA
Veç një dashuri deti
Të puthë dhe këmbët
E mezi ndahet në breg.
Kozma Gjergji.
Tungjatjeta i dashur Sotir! Faleminderit për vëmendjen, ndjeshmërinë dhe solidaritetin e vazhdueshëm prej miku e kolegu ndaj krijimtarisë sime. Është gjë mjaft e vlefshme dhe që i bën mirë klimës krijuese e shpirtërore të secilit. Siç dihet mardhëniet e miqësitë midis vetë artistëve dhe ato me publikun përherë kanë pas qenë çmuar e çmohen për vlerat e gjithçka japin e marrin me njëri tjetrin. S'ka si ndodh ndryshe përsa çdo produkt krijohet për t'u konsumuar ose shijuar.
Të uroj shëndet e frymëzime të reja sa më interesante e cilësore, K.Gjergji.
S.Athanasi:
Sërisht një cikël i ri i tejndritshëm dhe mbushur me mënçuri poetike i mikut tim, K.Gjergji. Po. Mbështes mendimin e poetit tjetër, M.Maska se edhe vetëm me këto cikle bëhet një vëllim dinjitoz poetik nga autori. Urime të më tejshme! / S.Athanasi/ Athinë.
Bëjnë rezonancë krejt të vaçantë në mua këto urime të sinqerta zemre për krijimet poetike nga një studiues e krijues zëmadh si Profesor Doktor Eshref Ymeri. Gëzimi më shumëfishohet kur ndonjëra nga poezitë ka arritur, ashtu siç thotë Profesori, "m'i preku fort telat e shpirtit". Ky vlerësim, përveç kënaqësisë, është edhe një testim aq i nevojshëm për çdo krijues. Falenderime! Me konsideratë të lartë, K.Gjergji.
Miku im Myslim, të falenderoj për konsideratën e mendimet e çmuara rreth poezive të këtij cikli. Ashtu si kënga s'ngopet kurrë së kënduari dashurisë, ashtu si jeta s'ngopet kurrë së kënduari këngë, ashtu edhe artisti s'ka të ngopur nga fjalët e mira dhe lavdërimet.
Ke të drejtë kur më thua se me këto cikle tanimë plotësohet libri. Të njëjtin mendim kam dhe unë e mendoj ta publikojë në vazhdim. Përqafime, K.Gjergji.
I dashur Kozma,
Urime nga zemra për poezitë: me fjalë tepër të kursyera, por të ngjeshura me mendime që të bëjnë të përsiatësh thellë. Ajo poezia “U ktheva” m’i preku fort telat e shpirtit.
Eshref Ymeri
Kaliforni, 23 mars 2022