Fatmir Terziu: Një grusht dhé nga larg

Dhimbjet nuk mbërrijnë thjesht si fjalë. Ato vijnë si një grusht dhé i hedhur mbi kujtime, mbi njerëz që kanë lënë gjurmë në jetën e një qyteti dhe në ndërgjegjen e një kohe. Z. Sadi Dokjen e kam njohur nga afër. Kam shkruar dhjetëra herë për të, e kam intervistuar dhe kam ndarë biseda e përshëndetje të shumta me të në vitet kur shërbeja si gazetar i RD-së, drejtues i TV “Dardan” dhe i gazetës lokale “Fjala e Lirë” në Elbasan. Ishin vite të mbushura me sfida, ideale dhe përpjekje për të ndërtuar një Shqipëri më të mirë, ku njerëz si ai ishin pjesë e pandarë e asaj rruge.

Ndarja e tij nga jeta është një humbje e madhe për familjen Dokja, për qytetin e Peqinit dhe për Partinë Demokratike. Ai nuk ishte thjesht ish-Kryetar i Bashkisë së Peqinit në vitet 1996–2000. Ishte një nga ata njerëz që besuan te ndryshimi që në fillimet e demokracisë dhe që kontribuan me përkushtim në themelimin e Degës së Partisë Demokratike në Peqin në vitet ’90.

Në kujtesën e atyre që e njohën, Z. Sadi Dokja do të mbetet si një njeri i urtë, i afërt me qytetarët, i përkushtuar ndaj detyrës dhe besnik ndaj vlerave që përfaqësonte. Kontributi i tij nuk matet vetëm me detyrat që mbajti, por me respektin që fitoi dhe me gjurmët që la pas.

Nga larg, në këtë çast ndarjeje, mund të sjell vetëm një grusht simbolik dhé mbi kujtimin e tij, si shenjë nderimi dhe mirënjohjeje për një njeri që i shërbeu komunitetit të vet me dinjitet.

Ngushëllimet më të ndjera familjes Dokja, miqve, bashkëpunëtorëve dhe të gjithë atyre që patën fatin ta njohin.

U prehtë në paqe kujtimi i tij.