Fatmir Terziu: “Illyrian Grill House” me „Shije tradicionale në Folenë e Shqiponjave!“.

“Illyrian Grill House” me „Shije tradicionale në Folenë e Shqiponjave!“.

Mentor Bokçiu përfaqëson atë biznesmen vizionari bashkëkohor që e ndërton suksesin jo mbi improvizimin, por mbi identitetin, kujtesën kulturore dhe guximin për ta përkthyer traditën në gjuhën e kohës. “Illyrian Grill House” nuk është thjesht një restorant shqiptar në diasporë, por një hapësirë konceptuale ku gastronomia shndërrohet në akt përfaqësimi kombëtar dhe kulturor. Nisja e vitit 2026 me moton domethënëse “Shije tradicionale në Folenë e Shqiponjave!” nuk është një slogan marketingu i rastësishëm, por një deklaratë filozofie, që i jep kuptim çdo elementi të këtij ambienti: nga menuja, te estetika, nga shërbimi, te vizioni i së ardhmes.

Pas kësaj fjale kyçe fshihet një projekt i menduar me kujdes, ku vera shqiptare zë një vend të veçantë si simbol i tokës, i klimës dhe i mjeshtërisë shekullore, ndërsa menuja e pasur tradicionale shfaqet si një hartë shijesh që përmbledh Shqipërinë etnografike në një tryezë moderne. Çdo pjatë nuk është vetëm ushqim, por rrëfim tradite, estetike, shijeje dhe vlere ushqimore, e përgatitur nga specialistë të përkushtuar, ajo ruan autenticitetin e recetës, ndërkohë që prezantohet me një estetikë bashkëkohore që e bën traditën të komunikueshme për publikun e sotëm. Kjo ndërthurje e së vjetrës me të renë është një nga pikat më të forta të “Illyrian Grill House” dhe një dëshmi e qartë e vizionit drejtues të Mentor Bokçiut.

Veçanërisht bien në sy djathrat shqiptarë, të larmishëm në shije, teksturë dhe origjinë, të cilët shërbejnë si një manifest i pasurisë agropastorale shqiptare. Përzgjedhja e tyre tregon jo vetëm kujdes profesional, por edhe një ndjeshmëri kulturore ndaj produkteve autoktone, të cilat shpesh mbeten në hije në tregjet ndërkombëtare. Në këtë hapësirë, djathi nuk është një shoqërues i heshtur i pjatës, por një protagonist që flet për malet, fushat dhe traditat e vendit.

Pronari Mentor Bokçiu shfaqet si një drejtues me horizonte të hapura për vitin 2026, me ide të reja që synojnë ta shndërrojnë “Illyrian Grill House” në një pikë referimi jo vetëm gastronomike, por edhe kulturore. Vizionet e tij për këtë hapësirë nuk kufizohen në zgjerimin fizik apo pasurimin e menusë, por synojnë krijimin e një përvoje të plotë shqiptare, ku mysafiri të ndiejë se ka hyrë në një “folé shqiponjash” ku shija, mikpritja dhe identiteti bashkohen në një tërësi koherente. Në këtë kuptim, “Illyrian Grill House” dhe Mentor Bokçiu janë shembull i asaj se si tradita, kur drejtohet nga vizioni, mund të shndërrohet në kapital kulturor dhe ekonomik të qëndrueshëm.