Fatmir Terziu: Gëzuar ditëlindjen, me mirënjohje dhe respekt të thellë Shefqet Karasani

Gëzuar ditëlindjen, me mirënjohje dhe respekt të thellë Shefqet Karasani

Natyrisht mbetet një ditë e veçantë. Festohet ditëlindja e një ish-kolegu që e ka ndërtuar jetën mbi themele të forta dijesh, përkushtimi dhe force karakteri. Festohet dita e lindjes së mësuesit, sportistit të talentuar të mundjes, trajnerit të palodhur dhe trashëgimtarit të denjë të traditave të Radoveshit të Ostrenit të Madh. Në mjediset dhe korridoret e shkollës së mesme të bashkuar Elez Koçi, ai nuk ishte thjesht një mësues. Ishte shembull. Ishte frymëzim. Ishte ai që diti të ndërtojë ura mes dijes dhe jetës, mes disiplinës dhe ëndrrës, mes fjalës dhe veprës. Breza të tërë nxënësish mbajnë në kujtesë jo vetëm mësimet e tij, por mbi të gjitha modelin e një njeriu të drejtë, të përkushtuar dhe fisnik. Si sportist i talentuar i mundjes, këtij sporti burrëror që kërkon jo vetëm forcë fizike, por karakter të pathyeshëm, ai i dha dinjitet dhe nder vendlindjes së tij, Radovesh dhe mbarë Ostren i Madh. Në tapet ai tregoi se fitorja lind nga sakrifica, ndërsa si trajner u mësoi të rinjve se humbja është mësim dhe se respekti për kundërshtarin është virtyt.

Festa me familjes

Ai është trashëgues i denjë i normave dhe vlerave më të mira të trevës sonë, burrërinë, fjalën e mbajtur, përkushtimin ndaj komunitetit dhe dashurinë për brezat që vijnë. Me qetësinë e tij, me maturinë dhe me punën e heshtur, ai ka lënë gjurmë që nuk shlyhen.

Jam krenar që kam pasur një koleg të tillë me vlera kaq të larta. Krenar që kam ndarë me të jo vetëm ambientin e punës, por edhe respektin për profesionin, për sportin dhe për njeriun. Në këtë ditëlindje, i uroj shëndet të plotë, jetë të gjatë, gëzim në familje dhe suksese të mëtejshme në çdo hap të rrugës së tij. Le të vazhdojë të mbetet shtyllë force, urtësie dhe frymëzimi për të gjithë ata që kanë fatin ta njohin. Gëzuar ditëlindjen, me mirënjohje dhe respekt të thellë!