Fatmir Terziu: Biblioteka e Prizrenit – Tempulli i dijes që vazhdon të frymëzojë

Biblioteka e Prizrenit – Tempulli i dijes që vazhdon të frymëzojë

Nga Fatmir Terziu

Biblioteka e Prizrenit, një ndër institucionet më të rëndësishme kulturore të qytetit, edhe një herë po dëshmon se misioni i saj për nxitjen e dijes, kulturës dhe krijimtarisë është i pandalshëm. Në vazhdën e aktiviteteve të saj të shumta, ky institucion ka ftuar të gjithë krijuesit që kanë aplikuar në Konkursin Letrar në prozë dhe poezi, si dhe të gjithë dashamirët e librit e të bibliotekës, të marrin pjesë në aktivitetin festiv që do të mbahet me rastin e festave të Nëntorit.

Ky aktivitet do të zhvillohet më 26 nëntor 2025, në ora 13:00, dhe me këtë rast do të publikohen edhe fituesit e Konkursit Letrar, një ngjarje e shumëpritur nga komuniteti krijues dhe lexuesit prizrenas.

Shkrimtarët janë gjithmonë të mirëpritur brenda mureve të Bibliotekës së Prizrenit, por një vend të veçantë zënë krijuesit shqiptarë që jetojnë në diasporë. Ata janë ura lidhëse mes atdheut dhe botës, ruajtës të gjuhës e traditave, dhe njëkohësisht kontribues që i japin letërsisë shqiptare frymë universale e bashkëkohore.

Në krye të këtij institucioni që rrezaton përkushtim e energji pozitive qëndron Sahadete Sadikaj-Kukaj, drejtoresha e Bibliotekës së Prizrenit, e cila njihet për angazhimin e saj të palodhur, qasjen dashamirëse dhe vullnetin për t’i afruar sa më shumë qytetarët me librin. Ajo ka qenë në qendër të shumë nismave kulturore, duke e konsoliduar bibliotekën si vendtakim të ideve, krijimtarisë dhe dijes.

Këtë vit, Biblioteka e Prizrenit shënoi edhe 80-vjetorin e veprimtarisë së saj, një jubile i rëndësishëm që nxjerr në pah rrugëtimin e saj të gjatë në shërbim të komunitetit. Drejtoresha Sadikaj-Kukaj ka theksuar se ky institucion ka qenë dhe mbetet një nga shtyllat kryesore kulturore të qytetit.

“Biblioteka jonë ka qenë pjesë e çmuar e komunitetit që nga themelimi i saj në vitin 1944, por edhe më herët, duke mos dashur që për asnjë moment t’i harrojmë traditat e hershme të bibliotekarisë në qytetin tonë. Për tetë dekada kjo bibliotekë ka shërbyer si një vend ku dijet ndahen, ku kulturat bashkohen dhe ku ëndrrat marrin formë, duke u shërbyer lexuesve të saj”, u shpreh ajo me rastin e këtij përvjetori.

Falë përkushtimit të stafit dhe mbështetjes së komunitetit kulturor, Biblioteka e Prizrenit vazhdon të jetë një vatër e gjallë e dijes dhe krijimtarisë. Aktiviteti i 26 nëntorit është një tjetër dëshmi se ky institucion jo vetëm ruan traditën, por edhe e pasuron atë me nisma të reja që frymëzojnë brezat e sotëm dhe të ardhshëm.

Falënderim i veçantë i shkon gjithë stafit të bibliotekës, për punën e palodhur e të përkushtuar, si dhe të gjithë atyre që me krijimtarinë e tyre e mbajnë gjallë shpirtin kulturor të Prizrenit.