Denisa Basha – Një prurje e re dhe e nderuar për paqe

Denisa Basha – Një prurje e re dhe e nderuar për paqe

-Federata Paqes Universale i jep titulli "Ambasadore për paqe"-

Në librin e vlerave të Federatës e Paqes Universale, Shqipëri, ku renditen emra të nderuar nga mbarë Ballkani dhe diaspora, u shtua edhe një emër i dashur për familjen time: Denisa Basha. Ajo ka lindur më 18 gusht 1991 në Peshkopi, qytetin ku jeton e punon edhe sot, duke e kthyer rrënjën e saj në burim shërbimi për njerëzit.

Ky është titulli i dytë që hyn në familjen Basha. Unë isha i pari që e mora këtë nder, si gazetar, poet e misionar i paqes. Sot, pas meje, Denisa – mbesa ime – e merr këtë stafetë, duke i dhënë kësaj vlere një frymëmarrje të re. Ky fakt nuk është vetëm një krenari personale, por edhe një amanet që lidhet mes brezave: titulli nuk është dekoratë, por përgjegjësi e madhe për të ndërtuar ura, për të mbjellë mirësi dhe për të ndriçuar të ardhmen.

Rruga e saj e karrierës dhe shërbimit

Denisa këtë titull e sheh si një dhuratë të madhe që kërkon përgjigje morale. Ajo ua dedikon, para së gjithash, prindërve të saj, Shaqirit dhe Dituries, të cilët i dhanë themelin e jetës dhe edukimit; së dyti vetes së saj, si një konfirmim se rruga e ndjekur në karrierë dhe jetë ka qenë e drejtë; dhe së treti, gjithë njerëzve të dashur që kanë qenë pranë saj, duke i dhënë forcë dhe besim. Për këtë, ajo falënderon stafin e FPU-Shqipëri dhe në veçanti kryetarin e saj, Dëfrim Met'hasani, për këtë vlerësim dhe përfshirjen e saj në familjen e madhe të paqebërjes.

Rruga e saj nuk ka qenë e rastësishme. Që nga bankat e gjimnazit “Said Najdeni” dhe më pas gjatë studimeve Bachelor e Master në Psikologji-Sociologji në Universitetin “Aleksandër Moisiu” – Durrës, Denisa ka ditur të shkrinte dijen me vullnetarizmin.

Angazhimi i saj në organizata si “Save the Children”, “World Vision” dhe më vonë me UNICEF e USAID, dëshmon se puna e saj ka qenë gjithnjë e lidhur me shërbimin ndaj njeriut. Gjatë pandemisë Covid-19, ajo nuk qëndroi në distancë, por ishte pranë mbi 5000 familjeve në nevojë, duke i mbështetur me përkushtim. Ajo ka ndihmuar fëmijë e gra që përballeshin me probleme sociale, familje të prekura nga trafikimi i qenieve njerëzore, si dhe ka kontribuar në riatdhesimin e familjeve të rikthyera nga emigracioni i paligjshëm. Në këto histori njerëzore, Denisa nuk ishte vetëm zyrtare, por një dorë e ngrohtë që u jepte shpresë.

Në dhjetor 2019, ajo mori detyrën e zëvendëskryetares së Bashkisë Dibër, duke shërbyer me përkushtim në një periudhë të vështirë, kur kriza shëndetësore dhe sociale kërkonte lidership të ndjeshëm. Më pas, si Shefe e Kabinetit të Kryetarit të Bashkisë, krijoi ura bashkëpunimi me partnerë ndërkombëtarë, duke sjellë projekte konkrete për shkollat dhe komunitetin.

Aktualisht, si Drejtore e Rinisë, ajo udhëheq mbi 150 të rinj aktivë, duke ngritur Këshillin Vendor Rinor dhe duke i dhënë zë brezit që është themeli i së ardhmes. Kjo është një punë që nuk matet vetëm me statistika, por me entuziazmin e syve rinorë që besojnë tek e ardhmja.

Kuptimi i titullit dhe mesazhi i saj

Denisa e sheh këtë titull jo si një kurorë mbi krye, por si një thirrje të re. Për të, ky është një moment ku puna dhe pasioni shkrijnë kufijtë me përgjegjësinë, një fener që ndriçon çdo hap të ardhshëm. Ajo e di se paqja nuk është fjalë, por veprim; nuk është dhuratë, por detyrë.

Sot, si xhaxha, ndihem krenar që në këtë 20-vjetor të Federatës së Paqes, mbesa ime renditet ndër 6000 ambasadorët e nderuar në hapësirën ballkanike dhe më gjerë. Ky është një amanet që e lidh familjen tonë me një mision më të madh: të shërbejmë paqes, jetës dhe dinjitetit njerëzor.

Nexhbedin Basha

16 shtator 2025