BUJAR QESJA: Graciano Shoshi historia e re e boksit

- Kampion absolut për 14 vjeçarët

- Ngren flamurin e fitores në Vlorën e Pavarësisë

-Cilësi e lartë e përfaqësimit

-Graciano Shoshi, Fred Shoshi dhe Enton Kikrri trioja e tangos së boksit

Nga BUJAR QESJA

Graciano Shoshi po trajtohet si mrekullia në lindje i boksit durrsak, por jo vetëm. Është vetëm 14 vjeç dhe në arenën e boksit, po vendos "mbretërimin".

Nga Vlora më vijnë vidiot e boksimit të tij, që e çojnë në krenarinë e një suksesi të bujshëm. Del kampion në peshën 70 kilogram dhe vlerësohet si boksjeri më i mirë i kampionatit kombëtar për shkollorët.

E kam ndjekur këtë djalosh, që kur i babai i tij, i "çmënduri" pas boksit Fred Shoshi, vendosi t'ia falë ringut, vendosi t'ia falë Durrësit të traditave në sportin e grushtave.

E kam fiksuar fizikun e tij të bëshëm, relativisht i shkurtër, i tulatur disi, por i bindur për të mbështetur nismën e babait për t'u marrë me boks. Shumë paqësor, por i duhej të vishej me cilësitë e "gladiatorit", të njeriut të pushtetshëm të ringut, për ta kthyer atë në shesh të fuqisë fizike dhe të forcës së karakterit.

Ndonëse 14-të vjeçar, nuk besoj se gaboj që sportin e dorezave e filloi 8 vite të shkuara. Dhe është stërvitur. Forca e butë e grushtave të tij, sa vinte e forcohej, për t'u kthyer në çelik prej mishi dhe gjaku, e duke ngritur me mund dhe përkushtim konturet e njeriut të gjithpushtetshëm të ringut.

Graciano po hidhte shtat, e grushti po i bëhej më shkatërrues. Nuk besoj se po hedh fjalë të tepërta, kur pohoj se ky djalë mund të quhet "bir i ringut". Flas dhe shkruaj kështu, pasi Graciano Shoshi, i mbështetur fuqimisht nga emri i njohur në Durrës për përkushtimin ndaj boksit Fred Shoshi, kaloi deri në tri stërvitje në ditë.

Rast i pazakontë ky, mbase edhe në botë. Veshi dorezat, uli kokën, shtoi punën, ndau mëndjen dhe legenat me djersë mbusheshin çdo ditë. Shkollë dhe ring. Ring dhe shkollë. Binom që me sa duket do ta ndjekë gjatë.

Nga mosha fare e njomë e deri tani, Graciano Shoshi po kthehet në kapitullin më tërheqës për të rinjtë, se me çfarë duhet të merren dhe se si mund t'ia dalin po të punojnë dhe përkushtohen. Por edhe Fred Shoshi, shkëlqen me shembullin e një prindi të rrallë, ku kërkon që djali i tij të bëhet dikushi në sport, por edhe i vlefshëm për shoqërinë.

Graciano Shoshi shkëlqeu në Vlorë, duke ndriçuar jo vetëm punën e tij, por i dha nder Durrësit, duke treguar se një histori e re e boksit po lind. I " shpartalloi" të gjithë rivalët, duke is qendisur fytyrat me grushtet e hekurta, të temperuara në kudhrën mahnitëse të ringut të fuqishëm durrsak.

Stërvitjet e Graciano Shoshit në moshën 6 vjeçare.

Dhe këtu çfaqet pa mburrje, madje në heshtje puna dhe vetmohimi i një djali tjetër durrsak, që pasi nisi të bëj histori në boks, vendos të konfirmojë fuqinë e tij në fushën e trajnimit. Mbase nuk dihet por po ua tregojmë, se stërviten nga Enton Kikrri dhe stafi i tij teknik, me qindra boksjerë moshash, numuri i të cilëve vjen në rritje.

Dhe ky Graciano Shoshi është kthyer në yllin e kësaj pune, në pikëvështrimin më shembullor nga të tjerët, se çfarë mund të bësh dhe si mund të kthehesh, kur përplas kokën në litarët e ringut, e krijon bindjen se mund të bësh gjëra të vlefshme.

Fred Shoshi (majtas), promotori i boksit shqiptar dhe trajneri Enton Kikrri

Graciano Shoshi kampioni durrsak në Vlorë. Graciano Shoshi më i miri ndër të mirët. Graciano Shoshi nxit krenarinë tek të rinjtë për t'u bërë sportistë niveli. Graciano Shoshi, shkëlqimi i çfaqur, për të kaluar në shkallët e karrierës i bindur në sukses.

Kështu si e ka nisur, forcoj bindjen se kalërimi i tij në arenën e boksit, veçse do të shtoj fuqinë e galopit. Tri herë stërvitje në ditë. Tri peshqirë që shtrydhen çdo ditë. Në mëngjes herët e vonë në mbrëmje, Graciano Shoshi ndez dhe shuan dritat e arenës. Vendos kundërshtarin imagjinar dhe e mbyt në grushta. Kështu tri herë në ditë.

Jo pa shkak u ndalëm gjatë në këtë shkrim, pasi kështu si kanë nisur punët, gjatë do të vazhdojmë të shkruajmë. Graciano Shoshit nisjen ia dimë, po se ku do të ndalet një Zot e di.

Durrësi e ka shkollën e boksit. Profesorë të tij janë Hilmi Reka, Fag Allushi, Ymer Reçi, Hysen Sharra, Selim Bardheti, Martin Çeta, Skënder Sadushi, Kreshnik Qato. Graciano Shoshi është nxënësi modern i tyre, për ta bërë më përfaqësuese dhe më të avancuar shkollën durrsake të boksit.

Graciano Shoshi, Fred Shoshi, Enton Kikrri trioja e tangos durrsake të boksit.

Çfarë arritje! Sa mirë kështu!

Performanca e Graciano Shoshit në kampionatin kombëtar të boksit për moshat, zhvilluar në Vlorë nga 16- 20 prill 2025.