AVDUSH CANAJ: S`ËSHTË ËNDËRR E PARË

S`është ëndërr e parë,

as e dytë,

Çamërisë ia putha sytë,

ia kreha flokët si motrushës.

U çmalla

duke ia shëruar dhimbjet.

Në Toplicë

piva ujë t`bilurit

te pusi i gurit.

Një fletë arre

për gjyshin këputa

e një tufë borzilok vere.

Oxhakët krejt

ende qëndronin drejt!

Në qerpikë qiparisash

zogjtë s`e kishin harruar këngën.

Një hingëllimë kali

dëgjova te Molla

dhe zërin e luleve:

Malli s`na lë të çelim!

Te ky gurdheu,

ishte Skënderbeu.

Deri këtu është Atdheu.