Albert HABAZAJ: AMI 5 VJEÇE
1 hour ago
1 min read
AMI 5 VJEÇE
Albert HABAZAJ
Sot princesha jonë e ëmbël
Si yllkëz parashkollore,
Mbush 5 vjeçe dhe për këngën
Vjen si mjaltë në akullore.
Si akullorja me mjaltë,
Si ëmbëlsirë, më e mira,
Si flutur me krahë të artë
Plot me ëndrra, me dëshira...
Ami sot feston ditëlindjen
5 vjeçe sapo mbushi,
Në qiell të shtatë familjen
Sapo na ngjiti Amushi.
Perla plot me ngazëllim
Si motër e madhe s'mbahet,
Qesh e lumtur, me gëzim
Motrës së vogël s'i ndahet.
5 vjeçarja nisi shkollën,
Ja për pak...në klasë të parë...,
Çfarë Eda me Nikun mbollën
Ne na bëjnë të qetë, krenarë.
Vlorë, e mërkurë, 23.09.2026
I dashur mik i mirë, si emri që ke, i mrekullueshmi prind, shembullori gjysh, i devotshmi mësues, i ndjeshmi poet, shpirtërori shkrimtar, seriozi studiues, bujari botues, misionar i lartë i fjalës së lirë të shqiptarëve, prof. Fatmir Terziu! Janë ca fjalë në gjuhën shqipe, që i kemi visare dhe duhet t'i mirëmbajmë, t'i ruajmë si sytë e ballit dhe t'i përdorim për atë njeri që e meriton. Pikërisht TI e meriton fjalën e çmuar: "T'U BËFTË DITA 1000!", se më doli vetvetiu nga shpirti, sapo lexova komentin tënd të dëlirë nga mirësia gjyshërore në publikimin e vjershëzës për mbeskëzën time, Amin, që dje, më 23 shtator mbushi 5 vjeçe. Më ke emocionuar shumë. Nuk kam fjalë... MIRËNJOHJE!
Urime, i dashur Albert Habazaj, për Amin e vogël!
Ka poezi që shkruhen me penë, por ka edhe poezi që lindin vetë në familje, në buzëqeshjen e një fëmije, në sytë e gjyshit e të gjyshes, në atë gëzim të pastër që nuk ka nevojë për shumë fjalë. “Ami 5 vjeçe” është pikërisht një poezi e tillë: e ëmbël, e ndritshme dhe plot me atë dritën e veçantë që vetëm fëmijëria di ta sjellë.
I dashur Albert, në vargjet tuaja Ami vjen si “flutur me krahë të artë”, si një yllkëz që sapo ka nisur të njohë botën dhe si një ëmbëlsi që e ngjit familjen “në qiell të shtatë”. Është bukur kur poeti nuk kërkon metafora larg vetes, por e…