Agim Lika: Ekspozita "Pasion për Pikturën" solli në Durrës një mozaik vlerash artistike

Në Galerinë e Arteve "Nikolet Vasia" në Durrës u çel më 20 korrik 2026 ekspozita kolektive "Pasion për Pikturën", një aktivitet që mblodhi artistë të njohur dhe krijues të apasionuar pas artit pamor.

Në ekspozitë morën pjesë Kastriot Gjinplaku, Ardit Faja, Migena Papajani, Sonja Morina, Ermir Llaftiu, Gentian Faja dhe Ergys Faja, të cilët prezantuan vepra me tema të ndryshme, ku spikatën peizazhet, monumentet historike, natyra dhe elementë të trashëgimisë kulturore shqiptare.

Një vëmendje e veçantë iu kushtua krijimtarisë së piktorit autodidakt Kastriot Gjinplaku, i cili përmes tablove të tij solli pamje nga Ishmi, Durrësi dhe vende të tjera me rëndësi historike e kulturore. Veprat e tij u vlerësuan për ndjeshmërinë artistike, përdorimin harmonik të ngjyrave dhe mënyrën se si përcjellin dashurinë për vendlindjen dhe kujtesën historike.

Ekspozita u vlerësua si një aktivitet që promovon artin bashkëkohor shqiptar dhe forcon lidhjen mes artistëve, institucioneve dhe komunitetit. Në ceremoninë e hapjes ishin të pranishëm Kryetarja e Bashkisë Durrës, Emiriana Sako, Nënkryetarja e Kuvendit të Shqipërisë, Klodiana Spahiu, si edhe përfaqësues të institucioneve vendore, artistë dhe dashamirës të artit.

Organizimi i ekspozitës u mbështet nga Njësia Administrative Ishëm, me kontributin e kryetarit Emirjan Bafti, si edhe nga artistët Idriz Balani dhe Dashamir Gurabardhi.

"Pasion për Pikturën" u mirëprit nga publiku dhe u cilësua si një veprimtari që dëshmon se arti vazhdon të mbetet një mjet i rëndësishëm për ruajtjen e identitetit kulturor, kujtesës historike dhe promovimin e vlerave krijuese shqiptare.