Gëzuar 7 Marsin, me respekt dhe mirënjohje për misionin fisnik të mësuesit!

Urime dhe Gëzuar 7 Marsin

Në prag të festës së 7 Marsit, një ditë që i kushtohet me respekt dhe mirënjohje figurës së mësuesit, u zhvillua një takim i veçantë me mësues që kanë dalë në pension gjatë vitit të fundit. Së bashku me Vesa Llanaj Liço dhe Kryetarin e Bashkisë së Elbasanit, Gledian Llatja, u krijua një atmosferë e ngrohtë vlerësimi për kontributin e tyre të vyer në edukimin e brezave.

Ky takim nuk ishte vetëm një moment falënderimi për punën dhe përkushtimin e tyre ndër vite, por edhe një mundësi për të ndarë ide e mendime mbi mënyrat se si kjo pasuri e çmuar njerëzore dhe profesionale mund të mbetet aktive në shërbim të fëmijëve tanë. Programi “Bëjmë detyrat e shtëpisë” është një nismë e bukur që sjell pranë nxënësve përvojën, urtësinë dhe aftësitë e jashtëzakonshme të këtij brezi mësuesish, duke e bërë dijen dhe përvojën e tyre pjesë të rrugëtimit të brezave të rinj.

Mes emrave të nderuar në këtë aktivitet pashë edhe zonjën Luiza Backa Dhimitruka, e cila u vlerësua me certifikatë për profesionalizmin dhe devotshmërinë e treguar në misionin fisnik të mësuesit. Ndjeva një kënaqësi të veçantë, pasi kam pasur fatin ta kem mësuese në shkollën e mesme. Ajo ka qenë dhe mbetet një figurë e respektuar, një mësuese e përkushtuar dhe plotësisht meritore për këtë vlerësim.

Urime zonjës Luiza dhe të gjithë mësuesve që me dashuri, durim dhe përkushtim kanë ndërtuar themelet e dijes dhe të karakterit të brezave.

Gëzuar 7 Marsin, me respekt dhe mirënjohje për misionin fisnik të mësuesit!